دوو هفته‌نامه‌یه‌کی سیاسی گشتییه‌ کۆمه‌ڵه‌ ده‌ری ده‌کات

له‌ یادی هاوڕێی شه‌هید، سووسه‌ن فه‌ریقی دا

هاوڕێ‌ سووسه‌ن فه‌ریقی ساڵی 1345 له‌ بنه‌ماڵه‌یه‌كی زه‌حمه‌تكێشی ئاوایی "مووسك"ی‌ ناوچه‌ی شاری مه‌ریوان له‌ دایك بوو و هه‌ر له‌و، شاره‌ دا چووه‌ مه‌كته‌ب، هێشتا منداڵ بوو كه‌ باوكی له‌ ده‌س داو دایكی سه‌رپه‌رشتی ئه‌وانی گرته‌ ئه‌ستۆ. سووسه‌ن هه‌ر له‌سه‌ره‌تای منداڵییه‌وه‌ هه‌ستی به‌و هه‌موو فه‌قر و مه‌حروومییه‌ته‌ ده‌كرد به‌ڵام زه‌ینی منداڵانه‌ی ئه‌و نه‌یده‌توانی له‌ریشه‌ی ئه‌و كێشانه‌ بكۆلێته‌وه‌. هاوڕێ‌ سوسه‌ن، خوشكی ژنه‌ هونه‌رمه‌ندی شۆڕشگێڕ هاوڕێ‌ "مه‌رزیه‌ی فه‌ریقی‌"یه‌. هاوڕێ‌ سووسه‌ن 12 ساڵان بوو كه‌ شۆڕشی جه‌ماوه‌ری ساڵی 57 ده‌ستی پێ كرد و ئه‌ویش به‌و هه‌سته‌ ناسكه‌ی منداڵییه‌وه‌ له‌خه‌باتی ئه‌و ده‌ورانه‌دا  به‌شداری كردو به‌ده‌نگه‌ گه‌رم و به‌ سۆزه‌كه‌ی شێعری شۆڕشگێرانه‌ی ده‌خوێنده‌وه‌.

هاوڕێ‌ سووسه‌ن فه‌ریقی پاش راپه‌رینی ساڵی 57 ده‌ستی كرد به‌هه‌ڵسووڕان له‌بنكه‌كانی ناوشاری سنه‌و له‌هه‌موو كۆرو كۆبوونه‌وه‌ ئامووزشی وسیاسی‌یه‌كاندا به‌و په‌ری زه‌وق و عه‌لاقه‌وه‌ به‌شداری ده‌كرد و له‌م رێگایه‌وه‌ له‌گه‌ڵ سیاسه‌ته‌كانی كۆمه‌ڵه‌ ئاشنا بوو. ساڵی 58 به‌ گیان له‌ده‌س دانی دایكی، ژیانی هاوڕێ‌ سووسه‌ن سه‌خت و دژوارتر بوو و زیاتر له‌ گه‌ڵ ره‌نج و سه‌ختی رووبه‌روو بوو. هاوڕێ‌ سووسه‌ن ساڵی 59 وه‌كوو هه‌وادارێكی نزیكی كۆمه‌ڵه‌ ده‌ستی دایه‌ فه‌عالییه‌تی سیاسی و له‌مه‌دره‌سه‌دا تراكت و ئیعلامییه‌ی كۆمه‌ڵه‌ی بڵاو ده‌كرده‌وه‌ و له‌سه‌ر دار و دیوار دروشمی شۆڕشگێڕانه‌ی ده‌نووسی.

 هاوڕێ‌ سووسه‌ن ساڵی 62 چیتر نه‌یتوانی له‌شار بمێنێته‌وه‌و په‌یوه‌ست بوو به‌ تشكیلاتی كۆمه‌ڵه‌وه‌وه‌و پاش ته‌واو كردنی ده‌وره‌ی فێرگه‌ی سیاسی_نیزامی له‌گوردانی شوان له‌ناوچه‌ی سنه‌ سازمان درا، پاش ماوه‌یه‌ك هه‌ڵسووڕانی بێ وچان له‌ناوچه‌ی سنه‌ بۆ ئامووزشی پزشكیاری نێردرایه‌ بیمارستانی كۆمه‌ڵه‌ و له‌ ناوچه‌ی باشووری كوردستان و له‌دوایی ته‌واو كردنی سه‌ركه‌وتوانه‌ی ئه‌م ده‌وره‌یه‌ به‌و په‌ری فیداكاری‌یه‌وه‌ وه‌كوو پزیشكیاری په‌لێك له‌پێشمه‌رگه‌كانی كۆمه‌ڵه‌ درێژه‌ی به‌هه‌ڵسووڕانی خۆی دا و له‌ماوه‌ی 5 مانگ دا خه‌ریكی كاری ده‌رمانی بوو له‌ ناو هاوڕێ‌یانی پێشمه‌رگه‌و خه‌ڵكی زه‌حمه‌تكێش دا.

هاوڕێ‌ سووسه‌ن به‌ رووحییه‌یه‌كی شۆڕشگێڕانه‌وه‌ به‌ره‌و پیری ئه‌ركه‌ شۆڕشگێڕانه‌كانی ده‌چوو، خوو و ره‌وشتی شۆڕشگێڕانه‌ ئه‌وی له‌ ناو هاوڕێیانی و له‌ناو خه‌ڵكی زه‌حمه‌تكێشی ناوچه‌كانی ساراڵ و به‌رپله‌ دا كردبووه‌ سیمایه‌كی خۆشه‌ویست و جێ متمانه‌. به‌ تایبه‌ت ئه‌و كاته‌ی كه‌ له‌ده‌سته‌ی سازمانده‌ی ساراڵ فه‌عالییه‌تی ده‌كرد ببووه‌ یاوه‌رێكی خۆشه‌ویست وجێگای رێز بۆ زه‌حمه‌تكێشانی‌ ئه‌م ناوچه‌یه‌ بۆیه‌ بیره‌وه‌ری هاوڕێ‌ سووسه‌ن ئێستاش له‌ دڵیان دا زیندووه‌و رێزی لێ ده‌گرن. به‌ داخه‌وه‌ ئه‌م كچه‌ شۆڕشگێڕه‌ و ئه‌م سیما ناسراو و خۆشه‌ویسته‌ی نێو پێشمه‌رگه‌كانی كۆمه‌ڵه‌ و خه‌ڵكی زه‌حمه‌تكێشی باشووری كوردستان رۆژی 27 ره‌شه‌مه‌ ساڵی 66 له‌گه‌ڵ هاوڕێیانی گوردانی شوان، له‌كاتی خۆده‌رباز كردن له‌نێو جه‌رگه‌ی شه‌ری ماڵ وێران كه‌ری ئێران-عێراق له‌ناوچه‌ی هه‌ڵه‌بجه‌ پاش موقاومه‌تێكی زۆر كه‌وته‌ به‌ر گولله‌ی به‌كرێگیراوانی كۆماری ئیسلامی‌و گیانی له‌ پێناو ئامانجه‌ به‌رزه‌كانی كۆمه‌ڵه‌دا به‌خت كرد.