پەیامی کومیتەی ناوەندیی کۆمەڵە بە بۆنەی، ۲۷ی رەشەممە رۆژی گیانبەختکراوانی کۆمەڵە





 خەڵکی سەربەرزی کوردستان!
بنەماڵەی گیانبەختکردووان!
تێکۆشەرانی کۆمەلە!

درێژەدەرانی رێبازی گیانبەختکردووانی کۆمەڵە، رۆژی خەبات و تێکۆشانتان باش.
ئەمڕۆش وەک نەریتی ساڵانە کۆبووینەوە، تا لە رۆژی گیانبەختکردووانی کۆمەڵەدا رێز بگرین لە خەبات و بیرەوەری و گیانبازی هەموو گیانبەختکردووانی کۆمەڵە و بزووتنەوەی کوردستان. کۆبووینەوە تا رێز بگرین لە بنەماڵەی گیانبەختکردووان کە خۆشەویستترین و ئازیزترین کەسەکانی خۆیان لە پێناو ئارمانەکانی کۆمەڵە و خەڵکی کوردستاندا بەخشیووەو چاویان لە ئێمە و هەموو تێکۆشەرانی کوردستانە ئاڵای هەڵکردووی خەباتی رۆڵەکانیان شکاوە رابگرین.
     بۆیە هەر لێرەوە روو لە بنەماڵەی گیانبەختکردووان دەڵێن ئێمە و ئێوەش سەربەرزین کە بە بوونی شەهیدەکانمان و ئێوەو سەدان و هەزارانی کەسی دیکە کە لەم رێبازەدا خەباتیان کردووە، پێکەوە بووین بە مێژووی کوردستان و کەس ناتوانێ ئەم مێژووە پڕ لە سەروەریە لە بەرچاو نەگرێ. رۆژی شەهیدان، بۆ ئێمە خەباتکارانی کوردستان رۆژی ماتەم گێڕان نیە، رۆژی بێ هیوا بوون نیە، بە پێچەوانە رۆژی پتەوتر کردنی پەیوەندییە لە نێوان ئێمەو ئێوەو خەڵکی خەباتگێڕی کوردستاندا، رۆژی وەبیرهێنانەوەو بە کارهێنانی دەرس و ئەزموونەکانە بۆ گەشەدارتر کردنی خەبات و لە خۆبووردووی. ئەمە ئەو دەرسەیە لە رێبەرانی شەهیدمان، لە فەرماندەو کادرو پێشمەرگە گیانبەختکردووەکانمان فێری بووین. بەو فیداکاری و خەباتەوەیە کۆمەڵە بوەتە خاوەن مێژوویەکی پرشنگدارو رێبەری بزوتنەوەی رزگاریخوازی لە کوردستانی ئێران. پێویستە هەموو خەڵکی کوردستان رێز لە بنەماڵەی گیانبەختکردووان بگرن، سەردانیان بکەن و گوڵی سور لە سەر گڵکۆی ئازیزانیان دابینێن، ئەم قەدرشناسیە بکەین بە کولتوری کۆمەڵگای خۆمان.
    جێی خۆیەتی لەم رۆژەدا یادێک بکەین لە هاوڕێیانی گوردانی شوان و 5 هەزار شەهیدی بێتاوانی هەڵەبجە کە بە دەستی دوو رژیمی دیکتاتۆری وەک کۆماری ئیسلامی و رژیمی بەعسی عیراق کە بە نامرۆڤانەترین شێوە و بە چەکی قەدەغە کراوشەهید کران. لە ئاست ئەو روداوە کارەساتبارە سەری رێزو ئیحرام بۆ شەهیدەکان و بنەماڵەکانیان دادەنوێنین. گوردانی شوان، رۆڵە چاونەترس و ئازاکانی جنوبی کوردستان لەو رۆژەشدا وەک هەمیشە سەنگەریان لە دوو دوژمن گرتوو تا دوا هەناسە وەک سەوڵی سەربەرز بە پێوە راوەستان و چۆکیان دانەدا بۆ دوژمن. گیانبەختکردووانی گوردانی شوان و هەموو گیانبەختکردووانی کۆمەڵە بە جەستە لامان روشتوون و ئەوان هەمیشە لە هەناوی ئێمە زیندوون، بەردەوامی خەباتمان و پێوست بوونی پۆل پۆل کچ و کوڕی کوردستان بە ریزەکانی کۆمەڵە ئەو راستیە دەسەلمێنێ کە یادو بیروەریان هەوێنی ئاوەدانی سەنگەرو درێژەدانی خەباتە.

کۆمەڵانی خەڵکی کوردستان!
   خەبات لە دژی رژیمی کۆنەپەرەستی کۆماری ئیسلامی، خەباتێکی درێژ خایەن بووەو ئێستاش درێژەی هەیە. ئێوە شاهیدی فیداکاریەکانی کۆمەڵە لە هەموو بوارەکانی خەباتدا بوون لە 4 دەیەیەی رابردوودا. ئەم خەبات و بەربەرەکانی بێ هاوکاری و هاوپشتی ئێوە مسۆگەر نەبووەو نابێ، بۆیە گرینگە زیاتر لە جاران پێکەوەو بە پاڵپشتی یەکتری بوارە جوارجۆرەکانی خەبات بۆ بە دیهێنانی ئامانجەکانمان لە کوردستانی ئێران پەرەپێ بدەین. با لە رۆژی شەهیداندا پەیمان نوێ بکەینەوە خەبات بە دژی ستەمی نەتەوەیی، خەبات بۆ دادپەروەری کۆمەلایەتی ، خەبات بە دژی هەڵاواردنی ژنان و بێمافی لاوان، هەروەها حوزوری پێشمەرگانە پێکەوە بە هێزتر بکەین و گەیشتن بە سەرکەوتن و بە دەست هێنانی مافەکانمان لەم رێگایەوە مسۆگەر دەبێ.
   هەمووان دەزانین کۆماری ئیسلامی، ئەگەر چی بە رواڵەت خۆی بە هێز نیشان دەدا، بەڵام لە راستیدا لە هەموو کات زیاتر لە ژێر گوشاری نێوخۆیی و ئابووری و دەرەکی دایە، هەر لەم رۆژانەدا گەورە بەرپرسانی کۆماری ئیسلامی نیگرانی خۆیان لە هەڵوەشانەوە لە نێوخۆی وڵات وەک نیگرانێکی جدی هێنایە سەر زمان. بۆیە خەباتی رێکخراوو هاوبەشمان دەتوانێ کاریگەری زیاتری هەبێ و دوژمن بە چۆکدا بێنێ. ئێمە هەر لە رۆژی شەهیداندا جارێکیتر بە ئەرکی خۆمانی دەزانین بۆ خەباتێکی گەرم و گوڕتر پێداگری لە سەر هاوکاری و کاری هاوبەشی زیاترو بە کردەی نێوان حیزبەکانی رۆژهەڵات بکەینەوە. بە کاری هاوبەش و هێزی هاوبەشمان دەتوانین بەشێک لە ئاواتی گیانبەختکردووانی هەموو لایەکمان وەدی بێنێن.
   لە پرژوبڵاویمان تەنیا کۆماری سێدارەی ئیسلامی قازانج دەکا و تەمەن زیاتر دەکا، کات بە فیڕۆدان لە بەرژەوەندی خۆمان و بزوتنەوەکەماندا نیە.

بنەماڵەی سەربەرزی گیانبەختکردووان!
   ئێمە هاوڕێیانی رۆڵە ئازیزەکانی ئێوە ئاسۆ رون دەبینین. ئاڵ و گۆڕەکان لەم ناوچەیە بۆنی ئەوەی لێ دێت بە خەباتی خۆمان و قۆستنەوەی دەرفەتەکان پێکەوە بتوانین خەباتی گەلانی ئێران و گەلی کوردیش قۆناغێکی دیکە ببڕێ.
   کۆمەڵە خۆی بۆ هەموو ئەگەر و روداوێک ئامادە دەکا تا بتوانێ بە پاڵپشتی و هێزی ئێوە شوێندانەر بێ لە سەر روداو پێشهاتەکان. بۆیە بە ئەرکی تاک وهەموو چین وتوێژێکی کۆمەڵگای کوردستان دەزانین بۆ بە هێزی کردنی کۆمەڵە و خەبات لە کوردستانی رۆژهەڵات هەنگاو هەڵگرێ و لە ژێر رێنوینی و سیاسەتەکانی کۆمەڵەدا بوارە جۆراوجۆرەکانی خەبات بە هێزتر بکەن.

  کچان و کوڕانی شۆڕشگێڕ!
ئێوە کە داینەمۆی شۆڕش و نەسڵی نوێ خەباتکارانی کوردستانن، پێویستە ئەوە راستیە بزانن کۆمەڵە حیزبی گەلی کورد و هیوا و ئاواتەکانی ئێوەیە، حیزبی ژنانە، حیزبی روناکبیرانە، حیزبی دادپەروەری کۆمەڵایەتی لە ئیستا و داهاتووی کوردستاندا، بۆ بە دیهێنانی ئامانجەکانی خۆتان و بزوتنەوەی رزگاریخوازی گەلی کورد، بۆ بە دیهێنانی ئاواتی گیانبەختکردووان و درێژەدانی رێبازەکەیان بێنە ناو ریزی پڕ لە شانازی کۆمەڵە. ئەرکی مێژووی خۆتان بە جێ بێنن، هیچ رژیمێکی داگیرکەر ودیکتاتۆر بۆ خۆی بە ئاسانی ناڕوا، بەڵام ئەگەر هێزی بەرینی خەڵک هاتە مەیدان بێگومان سەرەڕۆترین رژیم و کەسی دیکتاتۆر خۆی لە ئاستیدا پێ راناگیری و دەڕوخێ.  هێزی خۆمان بناسین و بە خەباتی هاوبەشمان رزگاری خۆمان دەستەبەر بکەین و ئاواتی گیانبەختکردووانمان بە دی بێنین.

بەرزو بەڕێز بێ یادی گیانبەختکردووانی کۆمەڵە و بزوتنەوەی کوردستان
سەرکەوێ بزوتنەوەی رزگاریخوازی گەلی کورد
بڕۆخی رژیمی سێدارەی کۆماری ئیسلامی ئێران
کومیتەی ناوەندیی کۆمەڵەی شۆڕشگێڕی زەحمەتکێشانی کوردستانی ئێران
27ی رەشەممەی 1395ی هەتاوی





ئه‌م بابه‌ته 1437 جار خوێنراوه‌ته‌وه‌‌

PM:06:27:16/03/2017