دەسپێكی وەرزی نوێی فێرخوازی و فێركردن پیرۆز بێ

هاونیشتمانیانی بەڕێز

خوێندكاران و مامۆستایانی ئێران
خوێندكار و مامۆستایانی كوردستان
 
رۆژی یەكی رەزبەر لە ئێران و خۆرهەڵاتی كوردستاندا، وەكوو رۆژی كرانەوەی قوتابخانە و خوێندنگە و زانستگاكان دەناسرێ و سەرەتای هاتنی وەرزی پاییز لە ئێراندا دەسپێكی ساڵێكی نوێ و وەرزی زانست و خوێندنە  و ئەم وەرزە لە بیرەوەی و كەلتووری كۆمەڵایەتیدا بۆن و بەرامەی خوێندن و فێرخوازیی بەخۆەوە گرتوە.
لێرەدا پێویستە هاتنی ساڵی نوێی خوێندن بە هەموو قوتابی و خوێندكار و فێرخوازێك لە ئێراندا پیرۆزبایی بڵێین، چوونكە ساڵێكی دیكە لە پرۆسەیەكی گرنگی پێگەیشتن و فێربوون دەست پێ دەكەن. هەروەها پیرۆزبایی لە مامۆستایانی خوێندنگەكان و مامۆستایانی زانكۆكان بكەین كە ساڵێكی دیكەی بەڕێوەبردنی ئەركی پیرۆزی مامۆستاییان دەست پێدەكاتەوە.
بەتایبەتیش پێرۆزبایی لە هەموو فێرخوازان و قوتابی و خوێندكار و مامۆستایانی كورد بكەین چوونكە لە وڵاتی ژێردەسەڵاتی رژیمی ئیسلامیی تاراندا، ئەوان لە نێو نەتەوەی ستەملێكراوی كورددا ئەركی گەورە و گرنگی فێربوون و فێركردنیان لە ئەستۆیە كە رۆڵەكانی گەل بۆ داهاتووی وڵات بار دێنن.
پێویست بە ئاماژە و زۆر وردبوونەوە ناكا كە خوێندن و  فێربوون لە هەر نەتەوە و كۆمەڵگایەكدا چ دەورێكی بنەڕەتی دەگێرێ و بەتایبەت لەم سەردەمەدا كە زانیاری و زانست بە خێراییەكی سەرسووڕهێنەر گەشە دەكا و شۆڕشی بەردەوامی زانست جیهان بە خێرا دەگۆڕێ، ئەو نەتەوانە سەركەوتوو دەبن و دەمێننەوە كە لەگەڵ رەوتی گەشەكردنی زانست لە ئاستی جیهاندا، خۆیان رێك بخەن و بیر و هزر و پەروەردەی نەوەی نوێیان بەو پێیە بڕواتە پێش.
ئەوەی لە ئێراندا دەیبینین هەرچەند بە رواڵەت دەسپێكی ساڵی نوێی خوێندن، دەسپێكی ساڵێكی دیكە لە فێربوونی رۆڵەكانی كۆمەڵگایە، بەڵام لەبەر بەلاڕیدابردنی سەرتاسەریی پرۆسەی خوێندن و پەروەردەدا، رژیمی كۆماری ئیسلامی لەباتی نوێبوونەوە بیر و هزری نوێ داهێنەرانە، هەوڵ دەدا كە پەروەردەی منداڵ و لاوانی ئێرانی، پەروەردەیەكی داخراو و چەقبەستوو بێ و بە بیری كۆن و دواكەوتوانە باربێن.
مامۆستایانی ئازیز ئێوە وەك توێژێكی زەحمەت كێشی كۆمەڵگا كە ئەركی قورسی پەروەردە كردنی نەسڵی نوێی كۆمەڵگاتان لەسەر شانە، بە درێژایی ئەم چەند ساڵەی دەسەڵاتی كۆماری ئیسلامی، لە شوێنی كارەكانتان بەرەورووی كێشەی زۆر بوونەتەوە و بەشی هەرە زۆری ئەو كێشانەش لە سیاسەتی رژیم و جۆری روانینی رژیمەوە سەرچاوە دەگرێت بەرامبەر بە سیستمی پەروەردە و بارهێنان. بوونی ناوەندە ئەمنیەتیەكان و حەراسەت لە شوێنی كار، كەم بوونی حەقدەست و مووچەی كاركردن كە وادەكات بەشی هەرە زۆری مامۆستایان بۆ بژێوی ژیانیان رووبكەنە كاری دووهەم و زۆر كێشەی تر لەشوێنی كاركردن بەشێك لەو كێشانەن. ئێمە وێرای رێزگرتن لەهەوڵ و ماندوو بوونەكانتان، بوونی هێمنی و ئاسایش لەشوێنی كار و باشتر بوونی بژێوی ژیانتان بە مافی بێ ئەم لاوئەولای ئێوە دەزانین.
جیا لە كۆی پرۆسەی خوێندن و پەروەردە لە ئێراندا، بوارێكی تایبەتیی دیكەی دەسپێكی ساڵی نوێی خوێندن، پرسی ئەو جینۆسایدە فەرهەنگییە كە لە ئێرانی ژێردەسەڵاتی شۆونیستیدا بەڕێوە دەچێ. دەسپێكی ساڵی نوێی خوێندن، هەرچەند لەبواری فێربوون و زانستەوە دەورێكی گرنگی هەیە، بەڵام بۆ میلیۆنان رۆڵەی نەتەوە ژێرستەمەكانی ئێران، دەسپێكی كوشتاری فەرهەنگییە كە خوێندن بە زمانی دایكی و زمانی نەتەوەكەی خۆیان لێ قەدەخە دەكەن و بە زمانێكی دیكە كە بۆ ئەوان بیانییە وانەیان پێ دەڵێنەوە.
لە راستیدا منداڵانی نەتەوە  ژێرستەمەكان لە ئێراندا و یەك لەوان نەتەوەی كورد، كە هەتا پێش دەسپێكی خوێندنی قوتابخانە بە زمانی دایكییان لە ماڵ و گەڕەك و لە نێو خەڵكی خۆیاندا دەدوێن و گوێبیستی دەبن، لە یەكەم رۆژی دەسپێكی خوێندنی فەرمیدا زمانی دایكییان دەبردرێتە كوشتارگەی فەرهەنگی و بە زمانێكی بۆئەوان بیانییە پەروەردە دەكرێن.
هیوادارین كە سیستمی دواكەوتوو و كۆنەپەرستی كۆماری ئیسلامی لەنێو بچی، چوونكە تەنیا بە نەمانی كۆماری ئسیلامییە كە درگای سیستمێكی نوێ و ئەمڕۆیی پەروەردە دەكرێتەوە و دەرەتانی ئەوەش دەرەخسێ كە منداڵانی نەتەوەكانی غەیر فارس لە ئێراندا بە زمانی دایكیی خۆیان بخوێنن.
جێی خۆیەتی لەم رۆژی دەستپێكردنی ساڵی نوێی خوێندندا، بە نیشانەی پارێزگاری كردن لە شوناس و كولتوری نەتەوەیی خۆمان وەك نەتەوەیەكی وشیار، بەجل و بەرگی رازاوەی كوردیەوە نەوەی نوێی ئەمرۆ و خاوەنداری دوارۆژو داهاتووی نەتەوەكەمان بۆ بەرەو زانستگا، قوتابخانە و ناوەندەكانی خوێندن بەرێ بكەین. هەوڵمان ئاخاوتن بە زمانی كوردی بێت و رۆژی كرانەوەی ناوەندەكانی خوێندن بۆ خوێندكاران و مامۆستایان بكەین بەكەرنەڤاڵێكی داكۆكی كردن لە شوناس و كولتوری نەتەوەییمان.
وێڕای پیرۆزبایی دووبارەی دەسپێكی ساڵێ نوێی خوێندن، بەهیوای گەشەكردنی كەلتووری مرۆڤدۆستی و داهێنەری لە ئێراندا و هاتنە دیی سیستمێك كە چیدی هیچ جۆرە جینۆسایدێكی سیاسی و فەرهەنگی و كۆمەڵایەتیی تێدا بەڕێوە نەچێ.
 
كۆمەڵەی شۆڕشگێڕی زەحمەتكێشانی كوردستانی ئێران
حیزبی دێموكراتی كوردستانی ئێران
٣٠ی خەرمانانی ١٣٩٦ی هەتاوی


ئه‌م بابه‌ته 373 جار خوێنراوه‌ته‌وه‌‌

PM:10:16:21/09/2017