ڕاگەیاندنی كومیتەی ناوەندی كۆمەڵە بە بۆنەی كۆچی دوایی كەسایەتی و ڕێبەری گەوره، مام جەلال تاڵەبانی

كومیتەی ناوەندی كۆمەڵە بە داخ و كەسەرێكی زۆرەوە، هەواڵی ماڵئاوایی مام جەلالی پێگەیشت. مام جەلال‌ كەسایەتییەكی‌ هەرە ناودار و شوێندانەری كورد لە كوردستانی باشوور، عێراق، و ڕۆژهەڵاتی ناوەڕاست بوو. كۆچی دواییشی پاش نزیك بە پێنج ساڵ نەخۆشی دەنگدانەوەیەكی گەورەی بووە لە هەموو كوردستان، لە عێراق و ناوچەكە و لە هەموو جیهاندا.
مام جەلال دۆست و دڵسۆزێكی بە وەفای بزووتنەوەی كوردستانی ڕۆژهەڵات و كۆمەڵە بوو. بۆیەش گومان لەوەدا نییە كە كۆچی دوایی جەنابیان، هەموو ڕێبەری و كادرەكانی كۆمەڵەی تووشی خەم و ماتەمینی كردووە.
بەو بۆنەیەوە‌ ئێمە سەرەخۆشی و هاوخەمی خۆمان ئاراستەی‌ هەموو ئەندامانی بنەماڵەی بەڕێزی تاڵەبانی، بە تایبەت بەڕێز هێرۆخان، بەڕێزان باڤل و قوباد تاڵەبانی دەكەین. سەرەخۆشی دەكەین لە مەكتەبی سیاسی، سەركردایەتی و هەموو كادر و ئەندامانی یەكێتی نیشتمانی. هەروەها لە لایەن هەموو كۆمەڵەوە سەرەخۆشی دەكەین لە گەلی خەباتكاری كورد لە كوردستانی باشوور و لەهەموو پارچەكانی دیكە بە تایبەت كوردستانی ڕۆژهەڵات.
هیواخوازین‌ هەر بەو شێوەی ژیان و وزەی مام جەلال لە عێراقی دوای سەدام حسێن لە پێناوی یەكڕیزی خەباتكارانەی گەلی كوردی باشوور بۆ دەستەبەركردنی مافە ڕەواكانی تەرخان كرا، كۆچی دواییشی هەر بە هەمان شێوە ڕێگا خۆشكەر بێت بۆ یەكڕیزی گەلی كوردستان باشوور لەو قۆناغە هەستیارەی ئێستادا و بۆ بەرپەرچدانەوەی هەڕەشە و مەترسییەكانی سەر كوردستان.

كومیتەی ناوەندی كۆمەڵەی شۆڕشگێڕی زەحمەتكێشانی كوردستانی ئێران
‌ ٤ی ئۆكتۆبری ٢٠١٧ی زایینی / ١٢ی خەزەڵوەری ١٣٩٦


ئه‌م بابه‌ته 742 جار خوێنراوه‌ته‌وه‌‌

PM:12:20:04/10/2017