ڕاگەیاندنی سكرتارییەتی كومیتەی ناوەندی سەبارەت بە پووچەڵ كردنەوەی هەوڵێكی تیرۆریستی دیكەی كۆماری ئیسلامی


دوانیوەڕۆی ڕۆژی شەممە ٩ی بەفرانباری ١٣٩٦ بەرامبەر لە گەڵ ٣٠  دێسامبری ٢٠١٧ی زایینی لە كاتێكدا كە پێشمەرگە و ئەندامان و لایەنگرانی كۆمەڵەی شۆڕشگێر سەرقاڵی خۆ ئامادە كردن بۆ بەڕێوەبردنی ڕێ و ڕەسمی پەیوەست بوونی پۆلێك لە كچان و كوڕانی خەباتكاری كوردستانی ڕۆژهەڵات بە ڕیزی هێزی پێشمەرگەی كۆمەڵە بوون، پیلانێكی تێرۆریستی دیكەی كۆماری ئیسلامی لە شێوازی چاندنی بۆمبی قەراخ جادە لە نیزیك بارەگای كۆمەڵە لە لایەن پێشمەرگەكانی كۆمەڵە كەشف كرا و دوای ئاگادار كردنەوەی هێزەكانی ئاسایش هەرێم هێزی تایبەت بە پۆچەڵ كردنەوەی بۆمب گەیشتنە شوێنی مەبەست و دووانیان پۆچەڵ كردەوە وسێهەمینیشیان تەقاندەوە كە جێی خۆیەتی هەر لێرەوە سوپاسی ئەو بەرێزانە بكەین. بەوجۆرە ڕووداوێكی تێرۆریستی كە دەیتوانێ خەساری گەورەی گیانی و ماڵی لێبكەوێتەوە و خەڵكانی مەدەنیش ببنە قوربانی بە وریایی پێشمەرگە‌ و تیمی ئەمنییەتی كۆمەڵە پێشی پێ گیرا و پۆچەڵ كرایەوە.
جێی وەبیرهێنانەوەیە كە ئەمە یەكەم جار نییە كۆماری ئیسلامی پیلانی لەو شێوەیە دژی كۆمەڵە دەگێڕێت و لە رێكەوتی ١٧ی گەلاوێژ ١٣٩٤ بەرابەر لە گەڵ  ٨ ئاگۆست ٢٠١٥ كۆمەڵێك بۆمبی دیكەیان لە بینای ڕێكخستنە نهێنییەكانی كۆمەڵە چاند و خۆشبەختانە ئەو پیلانەش بە وریایی هێزە ئەمنییەكانی كۆمەڵە سەری نەگرت.
كۆماری ئیسلامی دەبێ باش بزانێت كە پیلان و كردەوەی لەو شێوەیە خەوش ناخاتە ئیرادەی پۆڵایینی كۆمەڵە بۆ دەستەبەركردنی مافە ڕەواكانی بزووتنەوەی ڕزگاریخوازانەی گەلی كورد و كۆمەڵە سوورتر و قایمتر لە جاران لە سەنگەری پێشەوەی بەرەنگاری وەستاوەتەوە و تا گەیشتن بە ئامانجە بەرزەكانی ناسرەوێت.

سكرتاریەتی كومیتەی ناوەندی كۆمەڵەی شۆڕشگێڕی زەحمەتكێشانی كوردستانی ئێران
١٠ی بەفرانبار ١٣٩٦
٣١/١٢/٢٠١٧


ئه‌م بابه‌ته 657 جار خوێنراوه‌ته‌وه‌‌

PM:10:20:31/12/2017