په‌یامی "ناوەندی هاوکاری" بە بۆنەی ٢٢ی ڕێبەندان ساڵڕۆژی سه‌رکه‌وتنی شۆڕشی گەلانی ئێران

پەیامی ناوەندی هاوكاری حیزبەكانی كوردستانی ئیران بە بۆنەی
٢٢ی ڕێبەندان ساڵڕۆژی سەركەوتنی شۆڕشی گەلانی ئێران

لەكاتێكدا لە ساڵوەگەری ٣٩ ساڵەی ڕاپەڕینی گەلانی ئێران بۆ ڕووخانی ڕژیمی پاشایەتی و هاتنە سەركاری ڕژیمیێكی ئازاد ودێمۆكراتیك نزیك دەبینەوە  كە خەبات بۆ ڕزگاری و ئازادی قۆناغێكی نوێی بڕیوە. خۆپیشاندان ونارەزایەتییە جەماوەرییەكانی ٧ی بەفرانبار و ڕۆژانی دواتری كاریگەی گەورەیان لە ئاستی كۆمەڵگا و دەسەڵاتی دیكتاتۆری داناوە وسیمایەكی تازەی خەباتكارانەیان  بە بزووتنەوەی حەقخوازانەی گەلانی ئێران بۆ دەستەبەركردنی ئازادی و هەلپێچانی سیستمی سیاسیی كۆماری ئیسلامی لە ئێران بەخشیوە . 
ئاخێزی بەرین و بەربڵاوی شار و ناوچە جیاجیاكانی ئێران ئەگەرچی لە ناڕەزایەتی بە دۆخی نالەباری ژیان و مەعیشەتی خەڵكەوە بوو، بێگومان بەرهەمی سیاسەتی چەوت و گەندەڵیی  ئابووریی داڕماوو ڕانتی و قۆرغكراوی سپای پاسداران و دام و دەزگا ئەمنییەتیەكانی سەر بە بەیتی خامنەیین كە هەر زۆر زوو ئاراستەیەكی سیاسیی بەخۆوە گرت و بەشداریی جەسوورانە و ماناداری ژنان، كرێكاران، خوێندكاران وباقی چین و توێژەكانی دیكەی كۆمەڵگا هیوایەكی تازەیان بە بزووتنەوە كۆمەڵایەتییەكان لە ئێران بەخشیوە. ناوەرۆكی ئەو خۆپیشاندانانە و پانتاییە جۆگرافیاییەكەی لە چاو خۆپیشاندانەكانی پێشووتری ئێران دەریان خست كە ئێران و خەباتی سیاسی و مەدەنی پێی ناوەتە قۆناغێكی نوێوە. سەرەكیترین بەرهەم و تایبەتمەندییەكانی ئەو قۆناغە : داماڵینی مەشرووعییەت لە سیستمی سیاسیی كۆماری ئیسلامی  لە هەر دوو باڵی ئیسڵاحخواز و بناژۆخوازو هەروەها كۆتایی هێنان بە چەقبەستوویی سیاسی و داڕمانی هەیمەنەی ڕژیم و لە بەرامبەریشدا بەرزبوونەوەی ورەی خەباتكارانەی خەڵكی بە زاڵە هاتوو، سەڵماندی قەڵای دیكتاتوریەت لە بەرانبەر هێزو ئێرادەی جەماوەردا ، چەند لاوازو زەبوونە .
ئاشكرایە ڕژیمی كۆماری ئیسلامی بە درێژایی تەمەنی نگریسی لە هیچ ئامرازوشێوازێك بۆسەركوت و داپڵۆسین، كوشتن و بڕین و زیندان و ئێعدام درێغی نەكردوە ، بەڵام  نەیتوانیوە هەستی ئازادیخۆازی لە  ئێران بكوژێت . بۆیە پاش تۆماركردنی مێژوویەكی رەش وكەڵك وەرگرتن لە هەموو دام و دەزگا سەركوتكەرەكانیەوە، بە هەموو پرۆپاگاندەی  میدیایی و ئیرشاد و سیستمی پەروەردەكەیەوە نەیتوانی ئاراستەی ویستی خەڵك و ئامانجەكانی شۆڕشی ساڵی ٥٧ كە بریتی بوون لە  نەهێشتنی هەڵاواردنی رەگەزی و چینایەتی، بەهرەمەندی  كەمایەتییە ئیتنیكی و نەتەوەییەكان لە مافە ڕەواكانیان ،و هەروەها دەستەبەكردنی مافی ژنان ، ئازادیی تاك و بە گشتی  بونیاتنانی ئێرانێكی ئازاد و دێمۆكرات وسكۆلار، بگۆڕێت .
لە ساڵیادی ٣٩ سالەی ڕاپەڕینی گەلانی ئێراندا بە چاوخشاندێكی كورت بە باردوخی سیاسی و ئابووریی ئێرانی ژێردەسەلاتی كۆماری ئیسلامی بەروونی دەردەكەوێت كە چۆن بەڕێوەبەرانی ئەو ڕژیمە ئاوات و ئامانجەكانی شورشی جەماوەرییان بە لارێدا برد و بە دواكەوتووترین یاسای سەردەم حاشایان لە ماف وئازادییەكان كرد و وڵاتیان نوقمی   گەندەڵی، دزی و تاڵان و بڕ و وێرانی كردوە .هەڵاوسانی ڕوو لە زیاد بوون و بەتاڵتربوونەوەی سندووقی پاشەكەوت، وەرشكستەیی بانكەكان، نوشستیی ئابووری و بێكاری و... ئابووریی ئێران و تەنانەت ڕژیم و دەسەڵاتیشی بە بن بەست گەیاندووە وتەنها ئاسوی گەش و هیوا بەخش بۆ كۆمەڵانی خەڵكی ئێران و چارەسەركردنی ئەو كێشانە گۆڕانی سیستەمی سیاسیە ، كە ئەمرۆ بە پانتایی ئێران بزووتنەوە مەدەنی و كۆمەڵایەتییەكانی (ژنان، خوێندكاران، لاوان، ژینگەپارێزی، كرێكاران و...) تێیدا لە گەشە سەندنی بەرچاودان.كەشی ترس و تۆقاندنی داسەپاوی دەیان ساڵەی ڕژیم شەقی گەورەی تێكەوتووە و خەڵك ترسیان ڕژاوە. لە ئاستی دەرەكی و ناوچەییشدا ڕژیمی كۆماری ئیسلامی لەگەڵ كۆمەڵێك كێشەی گەورەی چارهەڵنەگر بەرەوڕووە. پشتیوانیی ئاشكرای لە تیرۆریزم، ئاژاوەگێڕی و شەڕەنگێزیی ڕژیمی كۆماری ئیسلامی لە ناوچەكە، بۆ دنیا ئاشكرایە و درێژەدانی ئەم سیاسەته ‌چیدیكە  قبوول ناكرێن .
بزووتنەوەی مافخۆازانەی كوردستان بە تایبەتمەندییە پێشكەوتنخوازانەكانی كە هەر لە سەرەتاوە پێشەنگی خەبات بۆ ڕووخانی ڕژیمی تۆتالیتێر و دیكتاتۆری كۆماری ئیسلامی بووە، بێ گۆمان لە داهاتووشدا ئەركی گەورەی لەو بوارە لە ئەستۆ دەبێت.
بە تێگەیشتنی دروست لە هەلومەرجی ئێستا و ئەركمان لە بەردەم ئەم گۆڕانە گەورە كۆمەڵایەتی و سیاسییە لە ئێران، لەم بڕوایە داین كە یەكێتی ، یەكڕیزی و هاوهەڵوێستیی هەموو ئازادیخوازان و ئۆپۆزیسیۆنی كورد و ئێرانی بۆ سەرخستنی ئەرك و ڕاسپاردە مێژووییەكانیان و پشتیوانی لە بزووتنەوە جەماوەرییەكان پێویستییەكی چارەنووس ساز و حاشاهەڵنەگرە.
ناوەندی هاوكاریی حیزبەكانی كوردستانی ئێران  وێڕای بەرز نرخاندنی شۆڕشی گەلانی ئێران لە ساڵی ٥٧ بۆ بنیاتنانی كۆمەڵگایەكی دێمۆكرات و سیكۆلار و دادپەروەر، پشتیوانی لە خەباتی خەڵك بۆ دەستەبەر كردنی ماف و ئازادییەكانیان و سەرەنجام گۆڕینی ڕژیمی سیاسی لە ئێران دەكات و خۆی بە پاڵپشتی هەر بزووتنەوەیەكی دێموكراسیخۆازانە دەزانێت بۆ لاوازكردن وهەلپێجانی ڕژیمی كۆماری ئیسلامی  ولە سەر پێویستی هاوكاری و هاوپشتی و هاوخەباتیی هەموو خەباتكاران و ئازادیخوازانی ئێران پێداگری دەكاتەوە.

سەركەوێت بزووتنەوی رزگاریخوازانەی گەڵی كورد
بڕووخێت دەسەلاتی كۆنەپەر‌ستی كۆماری ئیسلامی لە ئیران .
ناوەندی هاوكاریی حیزبەكانی كوردستانی ئێران
19ی رێبەندانی 1396 هەتاوی
٨ی فێوریەی ٢٠١٨ی زایینی

 

 

 

ئه‌م بابه‌ته 617 جار خوێنراوه‌ته‌وه‌‌

PM:01:50:09/02/2018