هەر پەری سەركەوت و دێوەزمە بەزی!

عەبدوڵڵا موهتەدی

ڕێ و ڕەسمەكانی نەورۆزی ئەمساڵ لە كوردستانی ڕۆژهەڵات تەنیا گرتنی جەژنی سەری ساڵی تازە نەبوون، تەنیا خۆشەویستی سروشتی جوانی كوردوەواری و ڕێز گرتن لە نەریتێكی كۆنی كوردی نەبوو، بەڵكوو لەڕاستیدا بزووتنەوەیەكی بەتەواوی مانا بوو، بزووتنەوەیەكی بەرینی كۆمەڵایەتی بوو بەپانایی هەموو كوردستان. ڕێ و ڕەسمەكانی ئەمساڵ وەستانەوە و وەڵامدانەوەیەك بوو بەرامبەر بەو هەموو كۆسپ و بەربەستەی كە بۆ گرتنی نەورۆز دایاننابوو، بەرپەرچدانەوە و بەگژداچوونەوەی قەدەغە و قۆرغەكان بوو، ململانێی كوڕ و كچ و پیرولاوی ئەم گەلە بوو لەهەمبەر دەسەڵاتی خۆداسەپێنی كۆماری ئیسلامی. نەورۆزی ئەمساڵ مەیدانی خۆڕائانی ئەو كەسانە بوو كە ویستیان پەیامێك بە رژیم بدەن و بڵێن سەرەڕای هەموو زەبروزەنگ و هەڕەشە و گوڕەشە و مۆڵەت پێنەدانەكان، دەتوانن سەرتاسەری ئەم سەرزەمینە، شار و گوند و خوار و ژووری وڵات، بە بەرچاوی هێزە سەركوتگەرەكانەوە، بەشیعر و سرود و پەخشان و هەڵپەڕكێ، فەتح بكەن و بیخەنە ژێر كۆنتڕۆڵی خۆیانەوە.
بەڕاستی جێی خۆیەتی دەستی چالاكانی ناوخۆی وڵات بگووشین و دەستخۆشیان لێبكەین. دەستیان خۆش هەموو ئەوانەی ڕێكخەر و پێشەنگی ئەو ڕێ و ڕەسمانە بوون، هەموو ئەوانەی بەڕێگەی یاسایی و مەدەنی و مەیدانی كاریان بۆ كرد و ڕێیان بۆ خۆش كرد، هەموو ئەوانەی تەداروكاتیان بۆ جێبەجێ كرد، هەموو دایك و باوكانێك بە بەشداری خۆیان مەشخەڵی فەرهەنگی نەورۆزیان تەسلیم بە نەوەی نوێی خەباتكار كرد، هەموو لاوان و مێرمنداڵانی بوێری كوردستان كە نەترسانە بە بەردەم هێزەكانی رژیمەوە جامانە لە مل و گوڵی سوور بەدەست تەمرینی ڕاپەڕینی سبەی رۆژیان كرد، هەموو ئەو بنەماڵە شەهیدانەی كە بە نوێنەرایەتی گلایەكمان ئاگری نەورۆزیان لەو بۆنەیەدا كردەوە. سڵاو لە هەمووتان و دەستی هەمووتان خۆش.


ئه‌م بابه‌ته 373 جار خوێنراوه‌ته‌وه‌‌

PM:05:39:09/04/2018