حەوتەمین كۆبوونەوەی ناوەندی هاوكاریی حیزبەكانی كوردستانی ئێران بەڕێوەچوو

ڕۆژی دووشەممە 11ی پوشپەڕی 1397ی هەتاوی، (02/07/2018) حەوتەمین كۆبوونەوەی ناوەندی هاوكاریی حیزبەكانی كوردستانی ئێران لە ناوەندی سەركردایەتی كۆمەڵەی زەحمەتكێشانی كوردستان بەڕێوەچوو.
پێشنیوەرۆی ئەمرۆ دووشەممە هەیئەتەكانی هەریەك لە حیزبی دیموكراتی كوردستانی ئێران، كۆمەڵەی شۆڕشگێڕی زەحمەتكێشانی كوردستانی ئیران، سازمانی خەباتی كوردستانی ئێران، حیزبی دیموكراتی كوردستان، و كۆمەڵەی زەحمەتكێشانی كوردستان، لە ناوەندی سەركردایەتی كۆمەڵەی زەحمەتكێشانی كوردستان كۆبونەوە چەندین پرسیان تاوتوێ كرد.
سەرەتای كۆبوونەوەكە پاش پەسند كردنی دەستوری كار، یەكەم بڕگە لە دەستوری كاری كۆبوونەوە كە تایبەت بوو بە تێكۆشان و چالاكیی نێوان دوو كۆبوونەوەی ناوەند لەلایەن بەرپرسی دەورەیی ناوەند، عەتا ناسرسەقزی ئەندامی دەستەی كارگێری كۆمەڵەی زەحمەتكێشانی كوردستان پێشكەش كرا.
لەبەشێكی دیكە كۆبوونەوەكەدا پەسەندكردنی لۆگۆی پێشنیاركراوی ناوەند قسەی لەسەر كرا‌و پاش چەندین تێبینی لایەنەكان، لۆگۆیەك وەك لۆگۆی فەرمیی ناوەندی هاوكاریی پەسەندكرا.
خاڵێكی دیكەی دەستوری كاری حەوتەمین كۆبوونەوەی ناوەندی هاوكاریی، باسێك بوو لەسەر پێكهێنانی ناوەند یان وتەبێژ یان نوێنەرایەتییەك لەئاستی باڵا بۆ پەیوەندییە نێودەوڵەتییەكان كە لەلایەن ناوەندەوە ئەركدار بكرێت‌و لەئەگەری رەزامەندی لایەنەكان پلاتفۆرمێكی بۆ بنوسرێت‌و میكانیزمی كارەكەی دیاری بكرێت.
باسێكی دیكە قسە بوو لەسەر كۆبوونەوەی كەسی یەكەمی هەر پێنج لایەن كە بەشداربووان پێیان باش بوو ئەو كۆبوونەوەی ئەنجام بدرێت‌و بڕیاردرا لەداهاتوویەكی نزیكدا كۆبوونەوەی كەسانی یەكەمی هەر پێنج لایەن كۆببنەوە.
باسەكانی حەوتەمین كۆبوونەوەی ناوەندی هاوكاریی پاش چەندین كاتژمێر كۆتایی پێهات.

ئه‌م بابه‌ته 517 جار خوێنراوه‌ته‌وه‌‌

PM:08:24:03/07/2018