21ی خەرمانان ئاوێنەی باڵانوێنی خەباتی خەڵكی كوردستانە
وتووێژ لەگەڵ عەبدوڵڵا ئازەربار، ئەندامی دەفتەری سیاسیی كۆمەڵە، سەبارەت بە قەیرانی ئێران، دۆخی ناوچەكە و ڕووداوەكانی مانگی خەرمانان
سازدان: سۆران ئازەربار
پرسیار: یەكێك لە كۆبوونەوە و دانیشتنە هەرە گرینگەكانی ئەم دوو مانگە دواییە، دانیشتن و كۆبوونەوە سێ قۆڵییەكەی نێوان سێ سەرۆك كۆماری ئێران، توركیە و ڕووسیا لە تاران بوو، خوێندنەوە و ڕوانگەی ئێوە چییە سەبارەت بەم كۆبوونەوەیە و دەرئەنجامە دواییەكانی؟
وەڵام: سەبارەت بە دانیشتنی سێ قۆڵی پێویستە بڵێم ئەم كۆبوونەوەیە سێهەمین لە زنجیرە كۆبوونەوەكانی كەمتر لە ساڵ و نیوی ڕابردووە، پرسی سووریە هەم ئاڵۆز و هەم پرسێكی ناوچەیی و جیهانیە و هەر چەند ئەم سێ هێزە كاریگەرن، بەڵام یەكلایی‌كەرەوە نین. ئەم كۆبوونەوەیە و كۆبوونەوەكانی پێشتریش بە بڕوای من بۆ كۆتایی‌هێنان بە جەنگ و خوێن‌ڕشتن نییە بەڵكوو شەڕی دابەش‌كردنی دەسكەوتەكانە بە دوو جیاوازیەوە: یەكەم، شەڕێكی پڕ هەزینە و كەم دەسكەوت بوو بۆ لایەنەكانی شەڕكە و دووهەم: هێشتا شەڕكە كۆتایی‌نەهاتووە تا ئەو بەناو دەسكەوتانە بەش بكرێن. هەرچی شەڕكەر و تیرۆریست و فیرقە چەكدارەكانن بە بەرەنگاری‌خوازانی خەڵكیشەوە پاشەكشێیان كردووە و پاشەكشێیان پێ‌كراوە بۆ ئەو ناوچەیەی ئێستا و ئیدلیب و دەوروبەری جمەی دێ لەم گڕووپ و تاقمانە و خۆیان لە نزیكەی 10 بۆ 20 هەزار چەكدار دا دەبیننەوە و بە ئەو قسەیە كە " تیرۆریستان دەبێ لەناو ببرێن" كۆتایی بە مەوزوعەكە نایەت. سەرۆكی ڕووسیە دەڵێ تیرۆریستان پێویستە چەكەكانیان دابنێن و خۆیان ڕادەست بكەن، پێم وایە ئەوە هەڵوێستە تا ڕێگای چارە. بەرژەوەندیی جیاواز هەیە لەم سێ قۆڵیەشدا. توركیە دوكەڵێكی زۆرتر دەچێتە چاوی و پەنابەری زیاتر ڕووی تێ‌دەكات، تیرۆریست و شەڕكەری زۆرتر خۆیان لە توركیە حەشار دەدەن و هەر وەها عەمەلیاتی شاخەی زەیتون و هەموو تێكۆشانی توركیە و ئەو خەرج و باجانەی لە كۆبانی و عەفرین و مەیدانەكانی شەڕی سوریە و ڕووبوونەوەی لەگەڵ ڕووسیە و ئامریكا و ئۆرووپا داویەتی و لە ناوخۆ و دەرەوە زیانی گەورەی پێ‌گەیاندووە، سەرەتا بۆ ڕووخانی بەشار ئەسەد و دواتر بۆ پچڕینی سەهمی زۆرتر و كۆنتڕۆڵی زۆرتر بە سەر بەشێك لە خاكی سووریە و ئێستا بۆ كۆنتڕۆڵی ئیدلیب، هەم بە هۆی توركەمانەكانی ئەوێ و هەم بە مەبەستی كۆنتڕۆڵی دوژمنانی سەرسەختی خۆی لە ئیدلیب خەریكە بۆ توركیە لەبار دەچێ، ئێران و ڕووسیە لە یەك‌تر نزیك دەكاتەوە هەرچەند ڕووسیە دۆستی واقعیی ئێران نییە و لە ڕووداوی كەوتنەخوارەوەی تەیارە شەڕكەرە ڕووسیەكە دەركەوت كە ئیسڕائیل بۆ لێدانی بنكە سەربازییە ئێرانیەكان لەگەڵ ڕووسیە هاوئاهەنگە. توركیە هەڵوێستی لە ئاڵمان و ئەمریكا نزیكە بەڵام وا بیردەكەمەوە تازە هاوهەڵوێستی وەفریای توركیە ناكەوێ. پێم وانیە ئەمە كۆتایی هەموو ماجراكەیە و هیوام بە كۆتایی شەڕ كەمە و پێم وایە هێشتا هەنگاوی چارەسەری نیهایی نەندراوە.
پرسیار: مووشەك‌بارانی حدك و حدكا و لە سێدارەدانی خەباتكارانی سیاسی كورد– ڕامین حسێن‌پەناهی، زانیار مورادی و لوقمان مورادی– چ پەیامێكی تێدابوو هەم بۆ وڵاتانی ناوچەكە و هەم بۆ حیزبەكانی كوردستانی ڕۆژهەڵات؟
وەڵام: بە بەڕوای من هەر كامیان چەند پەیامیان تێدا بوو. ئیعدامی ڕامین حسێن‌پەناهی كە ساڵێك بوو دەسگیر و زیندانی بوو، هەر وەها زانیار و لوقمان مورادی كە نزیكەی دە ساڵ بوو لە زینداندا بوون، خاوەنی كەمپەینی زۆر گەورە و بەرفراوان بوون بۆ هەڵوەشاندنەوەی ئیعدامەكانیان، بەڵام كۆماری ئیسلامی بە ئیعدامیان ئەو پەیامانەی گەیاندە گویی هەموان كە گوێ ناداتە ناوەندەكانی مافی مرۆڤ و بە ڕەسمیەتیان ناناسێ و هیچ ڕێز و بەهایەك بۆ ئەم پرسانە قایل نییە لە لایەكی‌ترەوە ئەو پەیامەی دەگەیاند كە كۆماری ئیسلامی هێشتا توانی زەبر و زەنگ‌نواندنی هەر وەكوو جارانە و چاو ترسێنی خەباتكارانی كوردی دەكرد كە نەكا پێیان وابێ كۆماری ئیسلامی بە هۆی فشاری دەرەكی و ناڕەزایی خەڵكی وەزاڵەهاتووی ئێران بێ‌هێز بووە و بیری ئەوە لە زەینیان چەكەرە بكات كە ڕژیم عومری كۆتایی‌هاتووە و كاتە‌وەختی ئەوەیە پەلامار بدرێ بۆ ڕووخانی. دیارە كۆماری ئیسلامی چوار دەیەیە زەبروزەنگ دەنوێنێ و تا ئێستا ناڕەزایی نەك كەمی نەكردووە و خەڵك چاوترسێن نەبوون بەڵكوو لە هەموو كات زیاتر هەم ڕژیم تەریك كەوتووەتەوە و هەم كوورەی خەباتی جەماوەر بەتینە و هەوڵكەی لە ڕاستیدا شكستی هێناوە و مان‌گرتنی 21ی خەرمانان ڕاستیی ئەم مەسەلەیەمان بۆ دەسەلمێنێ.
سەبارەت بە مووشەك‌بارانی حیزبی دیموكرات، جارێك‌تر و بۆ دەورێكی‌تر كۆماری ئیسلامی دەستی داوەتەوە عەمەلیات لە دەرەوەی سنوورەكانی و هەرچەند ئەو مووشك‌بارانە یەكەم هەنگاوی نەبوو، بەڵام دەیەوێ ئەم پەیامە بنێرێ بە وڵاتانی ناوچەكە كە توانای مووشەكیی بەهێز و دەقیقی هەیە و نیشان بدات كە هێشتا هێزە لە دەرەوەی سنووری خۆی و بە تایبەتی بە دنیای دەوروبەر نیشانی بدات كە عێراق وەك جاران بەشێكە لە شەڕگەی ئێران و بێ‌پرس و ترس هەر كات بیهەوێت كاری تێدا دەكات. لە لایەكی‌ترەوە ئەو پەیامە دەنێرێ كە شەڕ تەنیا لە چوارچێوەی سنووری ئێران نییە و ئێران دەست‌كراوەیە لە دەرەوەی سنوورەكانی خۆی و حیزبەكانی ڕۆژهەڵات و پێشمەرگەكانیان پێیان وانەبێ كە تەنیا ناوسنوورەكانی ئێران مەیدانی شەڕەكەیە. شەڕ لە دەرەوەی سنووری ئێران بە هەموو باج‌وهەزینەكانیەوە بۆ ئێران لە شەڕی ناو سنوورەكانی بە سوودترە و ئەوە لە وڵامی ئەم هەوڵانەیە كە خوازیارە كێشەی ئێران بچێتەوە ناو سنوورەكانی ئێران. بەڵام دیارە كۆماری ئیسلامی هیوابڕاو بووە لەوەی بە ڕێگای ئارام ڕزگاری دەبێ و ئەوە ئاخرین دەست كوتانەكانیەتی بۆ مانەوە و تاكە ڕێگایەكە شكی دەبات. هەرچەند ئەو عەمەلیاتە لە جۆری خۆیدا هێرش‌بەرانە و تەجاوزكارانەیە، بەڵام لە ماهیەتی خۆیدا دیفاعی و زەبوونانەیە و لە كزیی كۆماری ئیسلامیی ئێرانەوەیە و هەر بۆیەش ناتوانێت كاریگەری دابنێ و ورەی بەرابەرەكەی بێنێتە خوار.
پرسیار: ئایا ڕژیم بە هەڕەشە، جوڵاندنی هێز، تۆپ‌بارانی سنوورەكان و مووشەك‌باران دەورێكی نوێی دەست‌پێ‌كردووە دژی حیزبەكانی كوردستانی ڕۆژهەڵات؟
وەڵام: بەڵێ، كۆماری ئیسلامی دەورێكی نوێی دەست‌پێ‌كردووەتەوە بەڵام ئەو دەورە نوێیەی لە چەند ساڵ لەوە پێشەوە دەست پێ‌كردووە، لە بۆمب چاندنەكانی كۆمەڵە و دیموكراتەوە دەستی پێ‌كرد، بە تیرۆر و كوشتن درێژەی داوە و بە مووشەك‌باران و هەڕەشە و گوڕەشە تا ئێرەی هێناوە، هەرچەند كۆماری ئیسلامی لە بەشێك لە هەوڵەكانی سەر نەكەوتووە و ئەوانەش كە بە داخەوە سەركەوتووە ڕیسوایی و بەدنێویەكی زۆری بۆ كۆماری ئیسلامی ئێران كڕیوە و هەموو ئەو تاك و كۆیانەن بە ئێستا و بە ڕابردووشەوە كە كۆبوونەتەوە و ئێستا سیمای كۆماری ئیسلامیان لە جیهان بەم شێوە دزێو و نا ئینسانی پێشكەش كردووە بە دونیای دەرەوەی خۆی و لە ناوخۆی ئێران متمانەی خەڵكی لە دەس داوە و جگە لە ئاڵقەیەكی بچووكی مەسڵەحەت‌خواز، هەموو خەڵكی ئێرانی دژ وەستاوەتەوە و ناڕەزایەتی پۆنگ‌خواردووی خەڵك كڵپە دەكات و ترسی خستووەتە جەستەی حاكمان و بوونەتە هۆێ بێ‌زاری لە ناوخۆ و دابڕان لە جیهان.
پرسیار: ڕاتان چیە سەبارەت بە مان‌گرتنی 21ی خەرمانان و پێتان وایە چ پەیامێكی بۆ ڕژیم و حیزبەكان تێدایە؟
وەڵام: ئەم مان‌گرتنە مان‌گرتنێكی زۆر گەورە و بەرین و سەركەوتوو بوو، 21ی خەرمانان ئاوێنەی باڵانوێنی خەباتی خەڵكی كوردستانە، ئادرەسێكی كامڵ بوو، وڵامێكی شیاو بوو، شێوازێكی كوردستانیانە بوو لە خەبات، ئەو خەباتە و ئەو شێوازە بۆ كوردستان ئاشنایە. لە خەباتی دژی كۆماری ئیسلامی، كوردستان نە یەك سات گومانی كردووە، نە یەك چركەسات وەستاوە. كۆماری ئیسلامی هەموو شێوازێكی سەركوتی بەكار هێناوە و كوردستانیش چەكی زۆر و كاریگەری بووە بۆ وڵام و بەرپەرچدانەوەی كە بەهێزترین چەكی دەستی خەباتی جەماوەری و مەدەنیە. كوردستان یەكەم سەنگەری بەرگری و تەنیا سەنگەری خۆڕاگری و مەكۆی زیندوو شۆڕش و داهێنەر لە خەبات و شكڵەكانیەتی و لە داهاتووشدا بە دڵنیاییەوە پێشڕەو دەمێنێتەوە.
پەیامی یەكەمی بۆ حیزبەكان ئەوە بووە كە ئەوان ڕیشەی قووڵیان لە كۆمەڵگای كوردستانە و جەماوەریان لەگەڵە و بانگەوازیان وڵام وەردەگرێتەوە. دووهەم هاوسۆزی و هاوهەڵوێستیان لەگەڵ ڕۆڵەكانی خۆیان كە یەكیان لە دار دەدرێ و ئەوی‌تریان بەر مووشەك‌باران دەكەوێ، نیشان دەدا ئەم خەباتە ڕەگیان لە یەك هەڵپێكراوە و درێژكراوەی یەكترین لە شكڵی خەباتی پێشمەرگانە و جەماوەریدا. هەر وەها ئەو پەیامەی تێدایە بۆ ئێمە كە بە یەكگرتوویی، سەركەوتن زامن و مسۆگەرە. كوردستانێكی یەكگرتوو هێزی یەكگرتووی دەوێ و هێزی یەكگرتوو زامنی كوردستانێكی یەكگرتووە. پەیامی بۆ كۆماری ئیسلامی ئەوە بوو كە ئیعدام و هەڕەشە و مووشەك‌باران، ورەی خەڵكی كوردستان و هێزەكانیان ناڕووخێنێ و بە جێگای ئەوە دەستەوەستان و زەلیلیان بكات، زۆرتر لە جاران جەسور و بوێر دێنەوە مەیدان. پەیامی بۆ دونیا ئەوە بوو كە حكوومەتێك كە ئاوا نامرۆڤانە لەگەڵ خەڵكی خۆی ڕەفتار دەكات و خەڵكەكەی وڵامێكی ئاوا مەدەنیانە دەدەنەوە شایستەی حكوومەت‌كردن بەسەر ئەم خەڵكەدا نییە، پێویستە چیتر پشتیوانی نەكرێت. شێوازی هەڵس‌وكەوتی خەڵك و حكوومەتی نیشاندا و پێگەیشتوویی و تێگەیشتوویی كوردستانی بە زەقی بەرجەستە كرد.
پرسیار: ئایا ئەو مان‌گرتنە دەتوانێت بنەمایەك بێت بۆ ڕۆیشتن بەرەو "كۆنگرەی ڕۆژهەڵات"، "میدیای هاوبەش"، "هێزی پێشمەرگەی هاوبەش"، "دیپلۆماسی هاوبەش" و...؟
وەڵام: هیوا دەخوازم وابێ، دیارە ئەم خەباتە بەرین و پێگەیشتوە، پشتیوانێكی بەهێزی پێویستە، دەنگ و ڕینگ و زمان‌حاڵێكی پێویستە و لێمان دەخوازێ هەنگاوەكانمان لەو ئاڕاستەیە دابێ، ئێمە وەك كۆمەڵەی شۆڕشگێڕی زەحمەتكێشانی كوردستانی ئێران بە تەواوی مانا بۆی تێ‌دەكۆشین و دەنگمان هەڵ‌بڕیوە بۆ پێك‌هێنانی هەر ناوەندێكی فەراحیزبی و نیشتمانیی لەم چەشنە. لە كۆنگرە و كۆنفرانسەكانی خۆمانەوە تا میدیاكان، ناوەندی مێری و تا ناوەندی هاوكاریی حیزبەكانی ڕۆژهەڵات و تەنانەت گەلێك جار فشاریشمان دڕووست كردووە. ئێمە هەر چەند بە داخین بۆ ئەوەی هەنگاوی شل لەم بارەیەوە هەڵگیراوە، بەڵام حیزبی خۆمان بە خەتاكاری ئەم كەم‌وكورتیانە نازانین. بزوتنەوەی گەلی كورد لە جەریانی ڕوو لە پێشی خۆی خاڵی ئیختیاری و ئیجباری لە پێشە، ئەو خاڵانەی ئێوە باسی دەكەن ئەگەر بە ڕەزامەندییش جێ‌بەجێ نەكرێن، ناچار دەبین لە كۆتاییدا هەنگاویان بۆ هەڵگرین و پێویستە بچنە بواری جێ‌بەجێ‌‌كردنەوە و یەك‌گوتاری و یەككرداری و هاوهەڵوێست‌بوون دڕووست دەكات كە هەنگاوی گەورە و كاریگەرن هەم بۆ پێوەندیی ئێمە و جەماوەر، هەم بۆ هاوئاهەنگی لە نێوان هێزە سیاسیەكاندا بە گشتی.
پرسیار: كاریگەریی مان‌گرتنی 21ی خەرمانان لەسەر كۆمەڵگا و نوخبە سیاسیەكانی ئێران چۆن دەبینن و پێتان وایە چەندە كۆمەڵگای كوردستان لە باری سیاسی و ڕێكخراوەییەوە دەكاتە نموونە و سەرچەشنی خەباتی سیاسی لە هەموو ئێران؟
وەڵام: بەبڕوای من كاریگەریی داناوە و كاریگەریی زیاتریش دادەنێت، تا ئێستاش بە هەڵویست و وتەكانیانەوە دیار و ئاشكرایە، ئەوان یەكەم جاریان نییە ئەم نموونانە لە كوردستان دەبینن و بە ڕای من بە نیشانەیەك لە بلووغی سیاسیی كوردستانی ئێرانی دەزانن، بە نیشانەیەك لە ڕێكخراو بوونیان دەزانن، بە نیشانەیەك لە نفوزی حیزبەكان و باشتر بلێم ڕیشەداربوونی حیزبیەتی دەزانن، بۆچوون و ڕەنگە جیاوازەكان لە كوردستان خۆی لە چوارچێوەی حیزبدا دۆزیوەتەوە كە نیشانەیەكە لە تێگەیشتوویی و پێگەیشتوویی كۆمەڵگای فرەچەشنی كوردستان و ئەوە سەرنجی ڕووناك‌بیران و نوخبەی ئێرانی بەرەو لای خۆی ڕاكێشاوە. كوردستان ئەگەرچی لە زۆر بواری وەك خزمەت‌گوزاری و ڕێگاوبان و هەلی كار و هتد... دواكەوتوو ڕاگیراوە، بەڵام لە بواری سیاسی و خەبات بۆ دەستەبەركردنی ماف و داخوازییەكانی خەڵك و بۆ دڕووست‌كردنی كۆمەڵگایەكی ئازاد و پێشكەوتوو، نموونە و سەرتۆپ بووە و هەتا نموونەیەكی لەم چەشنە ڕوودەدا جێگە و پێگەی كوردستان قایم‌تر و بەهێزتر دەكات. لە دوای ڕووداوەكانی بەفرانبار هەم كوردستان "21ی خەرمانان" ێكی پێویست بوو هەم كوماری ئیسلامی وڵامێكی لەم چەشنە.
پرسیار: دوای لە سێدارەدانی ڕامین، لوقمان و زانیار و مووشەك‌بارانی كۆیە، سەفارەتی ئێران لە "پاریس" و "ئاتێن" هێرشیان كرایە سەر و ڕژیم حیزبەكان بە تاوانبار دەزانێت، هەڵوێستی ڕەسمیی ئێوە چیە لەو بارەوە؟
وەڵام: ئەوە ڕاستە كۆماری ئیسلامی لە ڕاگەیاندنەكانیەوە ناوی كۆمەڵە دەهێنێ و هێرشەكە دەخاتە ئەستۆی كۆمەڵە، بەڵام یەكەم دیارە گەورە كردنەوەیەكی بە ئەنقەست و زۆری تێدا بوو، چونكوو نە سەفارەتی گیراوە و نە ئاگری‌تێ‌بەردراوە ئەو جۆرەی ئێران سەفارەتی خەڵكی دەگرت و دەیسوتاند. كۆماری ئیسلامی چنگی دەگێڕا شتێكی دەسكەوێ لە نەتەوە یەكگرتووەكان مەزلووم نمایی پێ‌بكات و ئەودەم ڕووداوی ئەهواز نەهاتبووە ئاراوە. دووهەم، ئەگەر سەرنج بدەینە ڕاگەیاندنەكەی كۆماری ئیسلامی ئاڕاستەكەی وڵاتی فەرانسەیە و دەڵێ پۆلیسی فەرانسە دوای گردبوونەوەكە شوێنی خۆپیشاندانەكە جێ‌دەهێڵێ و ڕێگا خۆش دەكات خۆپیشان‌دەران هێرش بكەنە سەر سەفارەت و كاتێك ئەوان خراپ‌كاریی خۆیان دەكەن و تەواو دەبن و دەڕۆن، پۆلیس دەگەڕێتەوە شوێنی مەئموریەتەكەی خۆی و ئەسڵی پەیامەكەی بۆ ئەوەیە بڵێ بە وتەی ئێران، تەنیا وڵاتانی ناوچەیی نین یارمەتی دژبەرانی ئێران دەدەن، ئەوەتا وڵاتە ئۆرووپاییەكانی وەك فەرانسەش ڕێگا بۆ دژبەرانی ئێمە دەكاتەوە هێرش بكەنە سەر سەفارەتەكانمان. كەس قسەی ئێرانی بە هەند وەرنەگرت و نە هەڕەشە و نە مەزلووم‌نماییەكەی یارمەتیەكی ئێرانی نەدا چون دەستی ئێران دەمێكە خوێندراوەتەوە.
پرسیار: ئایا دوای مان‌گرتنەكەی 21ی خەرمانان پێویستی سەر لە نوێ پێناسەكردنەوەی كۆمەڵگای مەدەنیی كوردستان و پرسی "ڕێكخستن" نەهاتووەتە ئاراوە؟
وەڵام: بە بڕوای من ئەو مان‌گرتنە شتێكی چاوەڕوان‌نەكراو نەبوو لە بزووتنەوەی كوردستان و چالاكانی خەباتی جەماوەری. ئێمە شاهیدی بزووتنەوەیەكی ڕیشەدار و بە ئەزموون و پێگەیشتووین لە كوردستان و هەرچەند پشتگیری و سەرخستنی هەمیشە دەبێ ئەركی نەپساوەمان بێت، بەڵام ئێمە لە سەرەتایەكەوە دەست پێناكەین تا پێویستمان بە پێناسەكردنەوەی كۆمەڵگای مەدەنی و بزوتنەوەكەی بێت، پرسی ڕێكخستن پێویستی بە هەڵوێستە لەسەركردن، وەستان و ڕامان و پێ‌داچوونەوە هەیە و ئێمە وەك هێزێك كە زۆرترین نرخمان بۆ ئەم جۆرە خەباتە داناوە و بە بەشێك لە سەرمایەی خۆمان و گەلەكەمانی دەزانین و گرینگیەكەی بە تەواوی مانا هەست پێ‌دەكەین، لە سەرمان ئەركە لە ڕێگای ڕاگەیاندنی گونجاو، تۆڕێك لە ڕێكخستن و هەموو كەرەستە گونجاو و كاریگەرەكان، تێ‌بكۆشین بۆ چنینەوەی دەسكەوتەكانی ئەم خەباتە و بردنیان بەرەو ئاڕاستەیەكی دڕووست كە بتوانێ خۆی پاتە كاتەوە، هەرجارە وەك شەپۆلەكانی دەریا بە هێز و تەوژمێكی گەورەتر و كاریگەرتر بێتەوە پێش. ئەوە ئەو چەكە كاریگەر و بەهێزەی ئێمەیە كە دەبێ و تا ئێستاش بە دڕووست سەرمایەگوزاریمان لەسەر كردووە. ئەوە تەنیا چەكی ئێمە نییە. كوردستان خەباتی پێشمەرگانەكەشی یەكێكە لە چەكە بەهێزەكانی مێژووی خەباتی دەیان‌ساڵەی و پێویستە بە هێز و وزەی نوێ بپارێزرێ و پەرەی پێ‌بدرێت. بەڵام ئێستا كە خەباتی چەكدارانە بەم شكڵە لە ئارادا نییە، خەباتی جەماوەری چەكە بەهێزەكەی دەستی بزوتنەوە ڕەواكەی كوردستانە و بە هەموان دەبێ پارێزگاری لێ‌بكەین.
پرسیار: لە ئاستی ناوچەییدا دەسدرێژیی مووشەكی و سەربازیی ئێران بۆ سەر سەروەری وڵاتی عێراق و حكومەتی هەرێمی كوردستان چۆن دەبینن و چۆنی لێكدەدەنەوە؟
وەڵام: حكومەتی عێراق و هەریمی كوردستان ئەو كردەوەیە مەحكوم دەكەن و پێیان خۆش نییە، بەڵام دەسەڵاتیان مەحدوودە و توانای وەستانەوەیان لە بەرابەر ئێران كەمە و گەلێك جاران نیازی وەستانەوەشیان كەمە. عێراق یەكێك لەم وڵاتانەیە كە ئێران بە تەواوی دەستی بەسەر داگرتووە و دەست وەردەداتە كار و باریەوە و لە هەڵبژاردنەكانیەوە تا ئەوەی دۆستی كێ بێ و دوژمنی كێ، لەگەڵ كام وڵات بازرگانی بكات، لە ناوخۆی چۆن تەعامول و سازان بكات و تەنانەت وردتر لەوانەش. دەوڵەتی عێراق سەروەری وڵاتەكەی جارجارە پێشێل ناكرێت، بەڵكوو ساڵەهایە پێشێل كراوە. بەشێك لە شەڕ و كێشەی دنیا لەگەڵ ئێران لەسەر ئەم پێشێلكاریانەیە و ئێران لە پاڵ دەسكەوتەكانی لەم كارە خەریكە باجە قورسەكەشی دەدات.
پرسیار: ڕاتان چییە سەبارەت بە داهاتووی هەرێم لە نێوان ئێران و عێراق و هەر وەها كاریگەرییەكانی لەسەر حیزبەكانی ڕۆژهەڵات، پێشمەرگەكانیان، ئۆردوگا و كەمپەكانیان، باری ئەمنیان و...؟
وەڵام: هەرێمی كوردستان وەك مەترسیەك چاو لێ‌دەكرێت لە هەر دوو لاوە. هەرێمی كوردستان كارتێك نییە ئێران و عێراق لە دژی یەك بەكاری بێنن. لە نێوان هەرێمی كوردستان و حكوومەتی عێراق پێكەوە ژیانێكی ئیجباری تێكەڵ بە عیشق و نفرەت هەیە. عێراق نە كوردستانی خۆش دەوێ و شانازی بە پێكەوەبوونی دەكات و نە ڕێگە دەدا جیا بێتەوە، یا تەنانەت هەرێمێكی سەقامگیری هەبێ و مافە قانوونیەكانی بۆ جێ‌بەجێ بكات. ئێران دوژمنی هەرێمی كوردستانە و دۆستایەتیی ئێران بۆ بەكارهێنانی هەرێمە بە سوودی خۆی و هیچ مەبەست و ئامانجێكی‌تری نییە و مێژووی پێوەندیی ئێران لەگەڵ هەرێم بێ‌‌شرۆڤە ڕوونە. ئەگەر هەرێم جارێكی‌تر بتوانێت سەنگی واقعیی خۆی لە عێراق بە دەست بێنێتەوە و یەك‌ڕیزیی ناوخۆی بپارێزێ، بێ‌گومانم دەستی ئێران كورت دەبێتەوە. ئەگەریش پێچەوانەكەی ڕوو بدات هەم هەرێمی كوردستان و بە دڵنیاییەوە ئێمەش لەگەڵ هەل‌ومەرجێكی دژوارتر ڕووبەڕوو دەبینەوە.
پرسیار: ئایا ئەم هیزنواندنەی ڕژیم سەرەتای هێرشێكی گەورەیە یان پاشەكشێیەكی گەورە؟
وەڵام: بە بڕوای من سەرەتایەك نییە چونكوو لەم كارانەی تا ئێستا گەلێك كردوون بەڵام تەوژمێكی نوێیە و پەیامێكی تێدایە و مەبەست لەم كارەی چنگ و ددان نیشاندانە لە قۆناغی یەكەم بە خەڵكی ناڕازی و وەزاڵەهاتووی ئێران، دواتر وڵاتانی دەوروبەر و نیهایەتەن بە هەموان كە كۆماری ئێسلامی دەوڵەتێكی بەهێزە و توانای بەرپەرچدانەوەی هەر چەشنە هێرش و تەماحێكی هەیە و زەهری خەڵك چاو ترسێن بكات و تۆقاندن بڵاو دەكاتەوە و سەرەنجام بە دنیای دەوروبەری خۆی دەڵێت هەزینەی شەڕ لەگەڵ من زۆرە. بەم كارە دەیهەوێ تەماحی دوژمنان و نەیارانی خۆی كەم كاتەوە. لە لایەكی ترەوە هیچ ڕێگایەكی‌تری لەبەردەم نەما جیا لە كوشتن و بڕین و زەبر و زەنگ نیشاندان. ئێمە دەبێت بەرهەڵستی ئەم تەوژمە نوێیە ببینەوە و خۆمان بۆ دەورێكی نوێ لە خەبات دژی كۆماری ئیسلامی ئامادە و ڕێك‌خەینەوە.
ئه‌م بابه‌ته 4146
جار خوێنراوه‌ته‌وه
PM:05:03:06/10/2018