وه‌فدێكی لاوانی كۆمه‌ڵه به‌شداریان له سمیناری

لاوانی حیزبی دیموكراتی كوردستان - ئێران كرد

رۆژی شه‌مه رێكه‌وتی ۶ ی ۱ ی ۲۰۰۷ ی زایینی له سه‌ر بانگهێشتی لاوانی دیموكرات وه‌فدێكی لاوانی كۆمه‌ڵه پێك هاتو له هاوڕێان نالی كاوه، خه‌بات قوره‌یشی و هاوڕی به‌ختیار بلووری  به‌شداریان له سمینارێك‌دا كه به بۆنه‌ی كۆتایی هاتنی پێنجه‌مین كۆنفه‌رانسی  ئه‌و رێكخراوه‌یه پێك هاتبو له‌وڵاتی نۆروێژ كرد، هاوڕی خه‌باتی قوره‌یشی به نوێنه‌رایه‌تی لاوانی كۆمه‌ڵه په‌یامێكی ئاراسته‌ی به‌شداربوان كردو پاشان سروودێكی پێشكه‌ش به به‌شداربوانی كۆنفه‌رانسه‌كه كرد ئه‌وه‌ش ده‌قی په‌یامی لاوانی کۆمه‌ڵه‌یه‌ كه له و بۆنه‌یه‌دا پێش‌كه‌ش كرا.

په‌یامی لاوانی كۆمه‌ڵه له سمیناری لاوانی حیزبی دیموكراتی كوردستان ـ ئێران له‌وڵاتی نۆروێژ؛

له‌دووری مه‌سكه‌نی ئه‌‌ژدادی خۆم پێم نایه دونیاوه

به ئاواتم كه رۆژێ خزمه‌تی خاكی وه‌ته‌ن که‌م

به‌رێزان سه‌ره‌تا به‌ناوی هه‌مو ئه‌ندامانی رێكخراوه‌كه‌مانه‌وه جوانترین سڵاوی شۆڕشگێرانه‌تان پێشكه‌ش ده‌كه‌ین و پیرۆزبایی كۆتایی هاتنی سه‌ركه‌وتوانه‌ی كۆنفه‌رانسه‌كه‌تان لێ‌ ده‌كه‌ین، هه‌روه‌ها هیوادارین بۆ خزمه‌ت به‌ لاوانی كورد هه‌رده‌م ماندوو نه‌ناس و تێكشه‌رو رووله گه‌شه‌بن، ئازیزان ئێمه ‌وه‌ك رێكخراوی لاوانی كۆمه‌ڵه‌ی شۆڕشگێری زه‌حمه‌ت كێشانی كوردستان، وه‌ك كۆمه‌ڵێك لاوی دووره وڵات له پێناو گه‌شه‌ ی بزووتنه‌وه‌ی كوردیدا ئاماده‌ین بۆ لێك نزیك كردنه‌وه‌ی لاوانی كورد به هه‌ر ره‌نگ و درووشمێكه‌وه‌ هه‌نگاوی ته‌واو هه‌ڵ بگرین، بۆ ئه‌م مه‌به‌سته پشتیوانی خۆمان له بزووتنه‌وه‌كانی لاوانی كورد له هه‌ر كوێ دونیادا به‌رێوه ده‌چێت ده‌ر ده‌بڕین، هه‌روه‌ها پشتیوانی و هاو خه‌باتی خۆمان له گه‌ڵ ئێوه‌ی ئازیز دووپات ده‌که‌ینه‌وه‌.

هه‌روه‌ك هه‌موان ده‌زانین به‌شێكی سه‌ره‌كی هه‌ر نه‌ته‌وه‌یه‌ك له لاوانی ئه‌و نه‌ته‌وه پێك دێت، كه واته ئه‌ركێكی گرینگ له پێوه‌ندی نه‌ته‌وه‌ی كورددا ده‌كه‌وێته سه‌ر شانی هه‌ر لاوێكی به‌هه‌‌ست، بۆیه وه‌ك لاوانی كۆمه‌ڵه داوا له ئێوه و هه‌مو لاوانی‌ تر ده‌كه‌ین كه بۆ ڕاهێنانی لاوان له بواری زمان و ئه‌ده‌بیات و كولتوری ڕه‌سه‌نی كوردی و په‌روه‌رده‌ی لاوان و ئاگا كردنه‌وه‌ی لاوانی كوردی نیشته‌جێ له هه‌نده‌ران له سه‌ر داخوازییه‌كانی نه‌ته‌وه كه‌مان با پێكه‌وه هه‌نگاوی به‌ که‌ڵك هه‌ڵ بگرین وهاوكاری نێوانمان زیاتر په‌ره پێ‌ بده‌ین.

سه‌ر که‌وێت بزووتنه‌وه‌ی شۆڕشگێڕانه‌ی گه‌ڵی كورد

بژی هاوخه‌باتی و هاوپشتی لاوانی كورد

رێكخراوی لاوانی كۆمه‌ڵه له نۆروێژ