له‌م رۆژه‌دا وێڕای‌ رێز گرتن له‌ یادی‌ ئه‌و و هه‌موو گیانبه‌ختكردووانی‌ ریزه‌كان و رێبازی‌ كۆمه‌ڵه‌ له‌ گشت مه‌یدانه‌كانی‌ خه‌باتی‌ شۆڕشگیڕانه‌ له‌ كوردستان، جارێكی‌ دیكه‌ سڵاو و رێزی‌ خۆمان پێشكه‌ش به‌ بنه‌ماڵه‌ی‌ سه‌ربه‌رزی‌ شه‌هیدان، زیندانیانی‌ سیاسی‌ و كه‌مئه‌ندامانی‌ شۆڕش و بنه‌ماڵه‌ی‌ هه‌موو پێشمه‌رگه‌ی‌ كۆن و نوێی‌ كۆمه‌ڵه‌ ده‌كه‌ین، هه‌روه‌ها سڵاوی‌ گه‌رم و هاوڕێیانه‌ی‌ خۆمان ده‌نێرین بۆ پێشمه‌رگه‌ دێرینه‌كانی‌ كۆمه‌ڵه‌ كه‌ ئێستاش كوردستان و بزووتنه‌وه‌كه‌ی‌ له‌ بیره‌وه‌ریی‌ خه‌باتی‌ پڕ له‌ شانازیی‌ ئه‌وان لێوانه‌، بۆ هه‌موو تێكۆشه‌رانی‌ دێرینی‌ گشت بوواره‌كانی‌ خه‌بات و بۆ زیندانیانی‌ سیاسیی‌ دێرین كه‌ به‌ خزمه‌تی‌ بێدرێغ و به‌ فیداكاریی‌ ئه‌وان خۆڕاگریی‌ جه‌ماوه‌ری‌ له‌ كوردستان هاته‌ دی‌. هه‌روه‌ها سڵاوی‌ گه‌رمی‌ دڵی‌ پڕهومێدی‌ خۆمان پێشكه‌ش ده‌كه‌ین به‌ پێشمه‌رگه‌كانی‌ ئێستای‌ كۆمه‌ڵه‌ و به‌ هه‌موو نه‌سلی‌ تازه‌ی‌ خه‌باتكار، له‌ هه‌موو مه‌یدانه‌كانی‌ خه‌بات و چالاكیی‌ سیاسی‌، رێكخستن، پێشمه‌رگایه‌تی‌ و رۆشنبیری‌ كه‌ جێگه‌ی‌ هیوا و هومیدی‌ سبه‌ی‌ رۆژی‌ كوردستانن.

ئێرانی‌ ئه‌مڕۆ، سه‌ره‌ڕای‌ ئه‌وه‌ی‌ له‌ژێر دیكتاتۆریی‌ ره‌شی‌ عه‌بای‌ ئاخونده‌كان و چه‌كمه‌ی‌ سوپای‌ پاسدارانه‌وه‌ به‌سه‌ر ده‌با و سه‌ره‌ڕای‌ ئه‌وه‌ی‌ كه‌ پشتی‌ كۆمه‌ڵانی‌ كرێكار و زه‌حمه‌تكێش و كه‌م داهاتی‌ كۆمه‌ڵگا له‌ژێر باری‌ قورسی‌ گرانیی‌ سه‌رسووڕهێنه‌ر و بێكاری‌ و قه‌یرانی‌ ئابووریدا چه‌ماوه‌ته‌وه‌، به‌ڵام له‌ هه‌مان كاتیشدا له‌ وه‌ستانه‌وه‌ و به‌ره‌نگاری‌ و به‌گژاچوونه‌وه‌ نه‌كه‌وتووه‌ و به‌تایبه‌ت له‌ ساڵی‌ رابوردوو ده‌نگی‌ بزووتنه‌وه‌ كۆمه‌ڵایه‌تییه‌كان خه‌ریكه‌ به‌رزتر و به‌رزتر ده‌بێته‌وه‌. بزووتنه‌وه‌ كرێكارییه‌ فراوانه‌كان، بزووتنه‌وه‌ی‌ خوێندكاران، ژنان، نه‌ته‌وه‌ بنده‌سته‌كان و بزووتنه‌وه‌ی‌ رۆشنبیری‌ خه‌ریكن زۆرتر و زیاتر، خۆڕاگرتر و سه‌رسه‌ختانه‌تر له‌ جاران سه‌ر هه‌ڵده‌ده‌ن. ناكۆكییه‌كانی‌ ناوخۆی‌ ده‌سه‌ڵات قیناویتر و دوژمنكارانه‌تر له‌ جاران هاتۆته‌وه‌ ئارا و ته‌نانه‌ت هه‌موو خه‌تێكی‌ سووریشی‌ به‌زاندووه‌ و ئیفشاگه‌رییه‌كانیان له‌سه‌ر یه‌كتری‌، گه‌نده‌ڵی‌ و مافیاكاری‌ ئه‌و تاقمه‌ جینایه‌تكاره‌ی‌ له‌به‌ر چاوی‌ هه‌مووان خستۆته‌ روو و هه‌موو نیزامی‌ كۆماری‌ ئیسلامیی‌ ئێرانی‌ له‌به‌ر چاوی‌ خه‌ڵك سووكتر و بێنرختر كردووه‌. بارودۆخی‌ ناوچه‌یی‌ و جیهانیی‌ ئه‌م رژیمه‌ش هه‌روا رووی‌ له‌ گرژی‌ و ئاڵۆزیی‌ زۆرتره‌. هه‌رچه‌ند بۆ پێشبینی‌ ره‌وتی‌ داهاتوو هێشتا زووه‌، به‌ڵام هه‌موو دیارده‌كان وا نیشان ده‌ده‌ن كه‌ كۆمه‌ڵگای‌ ئێران و رژیمی‌ كۆماری‌ ئیسلامی‌ به‌ره‌و قه‌یرانێكی‌ قووڵ‌ و به‌ره‌و گۆڕانێكی‌ چارهه‌ڵنه‌گر هه‌نگاو ده‌نێن.

ئه‌م بارودۆخه‌ وشیاری‌ و یه‌كگرتوویی‌ و تێكۆشانێكی‌ هه‌رچی‌ زیاتر له‌ هه‌موو خه‌ڵكی‌ كوردستان و له‌ ریزه‌كانی‌ كۆمه‌ڵه‌ش ده‌خوازێ‌. كۆمه‌ڵه‌، به‌دوای‌ ئه‌وه‌ی‌ كه‌ له‌ ساڵی‌ رابوردوودا تووشی‌ سه‌رئێشه‌یه‌كی‌ نه‌خوازراو هات، ئێستا ئاماده‌تر و گه‌رم وگوڕتر، سه‌رودڵخۆشتر و پڕ له‌ هیواتر، ساغتر و پته‌وتر و به‌رچاوروونتر له‌ هه‌میشه‌ له‌ هه‌موو مه‌یدانه‌كانی‌ خه‌باتدا سه‌رگه‌رمی‌ تێكۆشانه‌. كۆمه‌ڵه‌، به‌ سه‌ركردایه‌تییه‌وه‌، به‌هه‌موو كادر و پێشمه‌رگه‌كانیه‌وه‌، به‌هه‌موو هه‌ڵسووڕاوانی‌ خه‌بات و رێكخستنی‌ نهێنییه‌وه‌، به‌ چالاكانی‌ هه‌موو بوواره‌كانیه‌وه‌، به‌روونی‌ هه‌ست به‌ مه‌سئوولییه‌تی‌ مێژوویی‌ خۆی‌ ده‌كا و ئاماده‌ی‌ به‌ڕێوه‌ بردنیه‌تی‌، هیچ سه‌ختی‌ و ته‌نگژه‌یه‌ك ئیراده‌ی‌ سست ناكا و كۆڵی‌ پێنادا، هیچ چه‌واشه‌كارییه‌ك رێگه‌ی‌ پێ‌ ون ناكا، هیچ هه‌ڕه‌شه‌ و تۆقاندنێكیش نایترسێنێ‌. كۆمه‌ڵه‌، وه‌كوو هه‌میشه‌، ئاڵاهه‌ڵگری‌ خه‌باتی‌ رزگاریخوازانه‌ی‌ نه‌ته‌وه‌یی‌ گه‌لی‌ كورد، ئاڵاهه‌ڵگری‌ نوێخوازی‌ و پێشكه‌وتنخوازی‌، ئاڵاهه‌ڵگری‌ ئازادی‌ و دێمۆكراسیخوازی‌ و دادپه‌ره‌وه‌ریی كۆمه‌ڵایه‌تی‌، پاڵپشت و رێكخه‌ری‌ خه‌باتی‌ كرێكاران و زه‌حمه‌تكێشانی‌ كوردستان له‌پێناو مافه‌كانی‌ ئێستا و دوارۆژیاندا، دۆست و دڵسۆزی‌ كۆمه‌ڵانی‌ خه‌ڵك و خه‌باتكاری‌ لێبڕواو و بێ‌ڕاڕایی‌ له‌حاست دوژمندایه‌ و هه‌ر واش ده‌مێنێته‌وه‌.

هێزی‌ پێشمه‌رگه‌ی‌ كۆمه‌ڵه‌ هه‌میشه‌ هه‌ڵگری‌ بیری‌ نوێ‌ و پێكشه‌وتنخواز، پارێزه‌ری‌ دێمۆكراسی‌ و مافه‌كانی‌ كۆمه‌ڵانی‌ به‌رینی‌ خه‌ڵك و و ئاڵاهه‌ڵگری‌ خه‌باتی‌ رزگاریبه‌خشی‌ كوردستان بووه‌. مێژووی‌ بزووتنه‌وه‌ی‌ سێ‌ ده‌یه‌ی‌ رابوردووی‌ كوردستان ده‌رخه‌ری‌ ئه‌م راستییه‌ن. ئه‌م هێزه‌ ریشه‌ی‌ له‌ناو جه‌ماوه‌ری‌ خه‌ڵكدایه‌ و هیچ دابڕانێكی‌ كاتی‌ ناتوانی‌ په‌یوه‌ندیی‌ قووڵی‌ نێوان هێزی‌ پێشمه‌رگه‌ی‌ كۆمه‌ڵه‌ و جه‌ماوه‌ری‌ سته‌مدیتووی‌ كوردستان كاڵ‌ و كه‌مڕه‌نگ كاته‌وه‌. هێزی‌ پێشمه‌رگه‌ ته‌نیا هێزێكی‌ شه‌ڕكه‌ر و چه‌كدار نه‌بووه‌، به‌ڵكوو له‌ هه‌مان كاتدا رێ‌نیشانده‌ر و رێكخه‌ر و وشیاریبه‌خش بووه‌.

جێی‌ خۆیه‌تی‌ هه‌ر لێره‌دا ئاماژه‌ به‌وه‌ش بكرێ‌ كه‌ هێزی‌ پێشمه‌رگه‌ی‌ كۆمه‌ڵه‌ له‌ ئاڵوگۆڕه‌كانی‌ داهاتووی‌ كۆمه‌ڵگای‌ ئێران و كوردستاندا بێگومان ده‌توانێ‌ و ده‌بێ‌ ده‌وری‌ كارا و كاریكه‌ری‌ هه‌بێ‌ و خه‌ڵكی‌ كوردستانیش ئه‌و چاوه‌ڕوانییه‌یان له‌ هێزی‌ پێشمه‌رگه‌ی‌ كۆمه‌ڵه‌ هه‌یه‌. هه‌ر بۆیه‌ش خۆ ئاماده‌ كردن و خۆ ته‌یار كردن بۆ به‌جێ‌ گه‌یاندنی‌ ئه‌ركه‌ مێژووییه‌كانی‌ خۆی‌ له‌ حاست بزووتنه‌وه‌ی‌ رزگاریخوازانه‌ی‌ گه‌لی‌ كورد، یه‌كێكه‌ له‌ ئه‌وله‌وییه‌ته‌كانی‌ هێزی‌ پێشمه‌رگه‌ی‌ كۆمه‌ڵه‌.