پاش ساڵه‌ها سته‌مكاری‌ و راگواستنی‌ زۆره‌ملی‌ و پاكتاوكردنی‌ ره‌گه‌زی‌ له‌ كه‌ركووك و ناوچه‌ دابڕاوه‌كانی‌ دیكه‌ی‌ كوردستانی‌ باشوور، پاش ئه‌وه‌ش كه‌ ده‌ستووری‌ هه‌میشه‌یی‌ عێراق له‌ ماده‌ی‌ سه‌دوچلی‌ خۆیدا بڕیاری‌ هه‌ڵوه‌شاندنه‌وه‌ی‌ ئه‌و سته‌مكارییانه‌ی‌ كرد به‌ یاسا و به‌ بنه‌مایه‌ك بۆ پێكه‌وه‌ ژیانی‌ ئازادانه‌ و هێمنانه‌ی‌ هه‌موو نه‌ته‌وه‌ و ئایینه‌كانی‌ ئه‌و ناوچانه‌، بڕیاره‌كه‌ی‌ ئه‌نجومه‌نی‌ نیشتمانیی‌ عێراق كه‌ هه‌موو ئه‌و ماف و یاسا و ته‌وافوقانه‌ پێشێل ده‌كات، بێگومان بۆ خه‌ڵكی‌ كوردستان قابیلی‌ قبووڵ‌ نییه‌ و ناشبێ‌ ببێت.

هه‌ر بۆیه‌ ئێمه‌ وێڕای‌ ده‌ربڕینی‌ ده‌نگی‌ ناڕه‌زایی‌ خۆمان به‌رامبه‌ر به‌و بڕیاره‌ نایاساییه‌، پشتگیری‌ خۆمان له‌ جه‌ماوه‌ری‌ گه‌لی‌ كورد له‌ كوردستانی‌ عێراق و هه‌روه‌ها له‌ په‌رله‌مان و سه‌رۆكایه‌تی‌ هه‌رێم و سه‌رۆكایه‌تیی‌ سیاسیی‌ كوردستانی‌ باشوور ده‌رده‌بڕین و ئاماده‌یی‌ خۆمان بۆ هه‌موو هاوكارییه‌ك و بۆ جێبه‌جێ‌ كردنی‌ هه‌موو ئه‌ركێك له‌پێناو مسۆگه‌ر كردنی‌ ئه‌و مافه‌ ره‌وایه‌دا ده‌رده‌بڕین و دڵنیاین كه‌ به‌ ژیری‌ و خۆڕاگری‌ و لێبڕاوییه‌وه‌ ده‌توانرێ‌ كه‌ركووك و هه‌موو ناوچه‌ دابڕاوه‌كان بگه‌ڕێنه‌وه‌ سه‌ر هه‌رێمی‌ كوردستان و له‌ هه‌مان كاتیشدا مافی‌ هه‌موو نه‌ته‌وه‌ و كه‌مایه‌تییه‌كان به‌شێوه‌یه‌كی‌ دێمۆكراتیك و به‌ گوێره‌ی‌ یاساكانی‌ مافی‌ مرۆڤ بپارێزرێن.