کۆمه‌ڵه‌ی شۆڕشگێری زه‌حمه‌تکێشانی کوردستانی ئێران
 

Komala Party- Iranian Kurdistan 
 

وتەی ڕۆژ

٢٠١٠-٠٦-١٤

به‌رده‌وامبوونی بزووتنه‌وه‌ی دیموكراسیخوازی

رووداوه‌كانی رۆژی ٢٢ی جۆزردان نیشانی دا كه‌ بزووتنه‌وه‌ی دیموكراسیخوازی زیندووه‌ و به‌هێزتر له‌ رابردوو خه‌ریكی بڕینی رێگای پڕ له‌ دژواریی گه‌یشتن به‌ دیموكراسی‌و مافه‌كانی مرۆڤ و تێكشكانی دیكتاتۆری و سه‌ره‌ڕۆیی ده‌سه‌ڵاتی ئایینی كۆماری ئیسلامی ئێرانه‌. رووداوه‌كانی رۆژی شه‌ممه‌ نیشانی دا كه‌ هیچ شتێك له‌ كۆمه‌ڵگا نه‌گۆڕاوه‌ و ده‌سه‌لاتی كۆماری ئیسلامی ته‌نیا له‌ رێگه‌ی له‌شكه‌ركێشی و سه‌پاندنی كه‌شی سه‌ربازی ده‌توانێ ئارامی و سه‌قامگیری بۆ شه‌قامه‌كان بگێڕێته‌وه‌ و له‌ هه‌ر غه‌فڵه‌تێكی چه‌كداره‌كان، شه‌قامه‌كان له‌ لایه‌ن خه‌ڵكه‌وه‌ داگیر ده‌كرێ.

به‌رینتربوونه‌وه‌ی ناره‌زایه‌تییه‌كان و به‌رده‌وامبوونی یه‌ك ساڵه‌ی بزووتنه‌وه‌ی دیموكراسیخوازی، حكومه‌تی ئیستبدادی كۆماری ئیسلامیی به‌ شێوه‌یه‌كی ره‌ها به‌ره‌و ئاراسته‌ی میلیتاریسم بردووه‌‌و بچووكتیرن ده‌ره‌فه‌ته‌كان ده‌توانێ كلیلی روخان و كۆكردنه‌وه‌ی كۆماری ئیسلامی لێبدات. ئه‌گه‌رچی له‌ رۆژی شه‌ممه‌ خۆپیشاندانی به‌ربڵاو له‌ چه‌شنی ساڵی رابردوو شكڵی نه‌گرت، به‌ڵام به‌رینتر و به‌ربڵاوتر له‌ رابردوو ناره‌زایه‌تی و بێزاری جه‌ماوه‌ر له‌ كۆمه‌ڵگا شه‌پۆلی دا و چه‌ندین تێكهه‌ڵچوون و پێكدادانی نێوان نارازیان و هێزه‌ سه‌ركوتگه‌ره‌كان نیشانی دا كه‌ سه‌ره‌ڕای بانگه‌شه‌ی به‌رده‌وامی حكومه‌ت له‌مه‌ڕ كۆتایهاتنی ناره‌زایه‌تییه‌كان، بزووتنه‌وه‌ زیندووتر له‌ رابردوو رێگا ده‌بڕێ.

ئه‌مجاره‌شیان زانستگاكان بوونه‌ پێشه‌نگ و ناوه‌ندی به‌هێزی خۆپیشاندان و ناره‌زایه‌تییه‌كان له‌ رۆژی شه‌ممه‌ له‌ زانستگاكاندا شكڵی گرت. خوێندكاران بۆ جارێكیتر ئاوانگاردبوون و به‌هێزبوونی خۆیان دووباره‌كرده‌وه‌ و پرۆژه‌ و پیلانه‌ په‌یتاپه‌یتاكانی وه‌ك دژایه‌تی له‌گه‌ڵ به‌دحیجابی و ده‌ركردنی خوێندكاران و هه‌ڕه‌شه‌ له‌ خوێندكاران له‌ یه‌ك ساڵی رابردوو له‌ ئاراسته‌ی بێده‌نگردن و كپكردنی ناره‌زایه‌تییه‌كانیان پوچه‌ڵ كرده‌وه‌.

ناره‌زایه‌تی به‌رین له‌ كۆمه‌ڵگا هاوكاته‌ له‌گه‌ڵ كێشمه‌كێش و ململانێی تووند له‌ نێوان باڵه‌كان و به‌رپرسانی كۆماری ئیسلامی و تا دێ ئه‌م ناكۆكی و كێشمه‌كێشانه‌ تووندتر ده‌بێته‌وه‌. بێ گومان به‌رده‌وامبوونی بزووتنه‌وه‌ی دیموكراسیخوازی و پێداگریكردن له‌سه‌ر ماف و داواكارییه‌كان ده‌توانێ كه‌لێنی نێوان ریزه‌كانی ده‌سه‌ڵات گه‌وره‌تر بكاته‌وه‌ و ئه‌م مه‌سه‌له‌ش له‌ دواجار قازانجێكی گه‌وره‌ی بۆ بزووتنه‌وه‌ لێده‌كه‌وێته‌وه‌.

ناره‌زایه‌تییه‌كانی جه‌ماوه‌ر له‌ رۆژی ٢٢ی جۆزه‌ردان بۆ جارێكیتر ئه‌م حه‌قیقه‌ته‌ی ئاشكرا كرد كه‌ ئومێد به‌ گۆڕان له‌ ناو جه‌ماوه‌ردا چه‌كه‌ره‌ی كردوه‌ و  هیچ هێزێك ئه‌و توانای نییه‌ كه‌ ئومێد به‌ گۆڕان له‌ كۆمه‌ڵگا له‌باربه‌رێت. یه‌كگرتوویی زیاتری ریزه‌كانی جه‌ماوه‌ر و به‌رده‌وامبوونی ناره‌زایه‌تییه‌ گشتییه‌كان، قه‌یرانه‌ له‌راده‌به‌ده‌ره‌كانی كۆماری ئیسلامی زیاتر ده‌كات و له‌دواجاردا براوه‌ی ئه‌م زۆرانبازییه‌ سیاسییه‌، جه‌ماوه‌ری نارازیی خه‌ڵكی ئێرانه‌.