کۆمەڵانی تێکۆشەری خەڵکی کوردستان،
بنەماڵەی سەربەزی گیانبەختکردووان،
کادر و پێشمەرگە قارەمانەکانی کۆمەڵە،
بەداخ و کەسەرێکی زۆرەوە رایدەگەیەنین کە دوانیوەڕۆی رۆژی شەممە رێکەوتی ٢٦ی رەشەمەی ١٤٠٢ی هەتاوی هاوڕێ شوعەیب زارعی ئەندام و پێشمەرگەی دڵسۆز و فیداکاری کۆمەڵە كە لەلایەن بەکرێگیراوێکی کۆماری ئیسلامی ئێرانەوە لە ئاوایی زەرگوێزەڵە نزیک لە شاری سلێمانی تێرۆرکرا، ئەمڕۆ یەكشەممە ٢٧ی رەشەمە كە هاوڕێكەوتە لەگەڵ ساڵڕۆژی گیانبەختكردوانی گوردانی شوان و ڕۆژی شەهیدانی كۆمەڵە، لە رێورەسمێکی شایستەدا و بە بەشداریی بەشێکی بەرچاو لە ئەندامانی سەرکردایەتی و کادر و ئەندام وپێشمەرگەكانی کۆمەڵە و خەڵکی سلێمانی و ئاواییەکانی دەوروبەری زەرگوێز و کۆمەڵێک حیزب و لایەنی سیاسی رۆژهەڵات و باشوور، لە گۆڕستانی زەرگوێزەلە وەك تەرمی نوێترین گیانبەختکردووی کۆمەڵە ئەسپەردە کرا.
کۆماری ئیسلامی کە لە لێواری هەڵدێری دواساتەکانی تەمەنی خۆیدایە بە باشی دەزانێت هەم لە ناوخۆی وڵات و هەمیش لەناوچەکە و تەنانەت لە ئاستی جیهانیش هیچ جێگەو پێگەیەکی نەماوە و هەربۆیە وەک پیشەی هەمیشەیی خۆی دەستی داوەتە تێرۆر و گرتن وکوشتن لە ناوخۆ و دەرەوەی وڵات كە تێرۆری هاوڕێ شۆعەیب نوێترین نمونەی جەنایەتەكانییەتی.
هەرچەند دەستی رەش و تێرۆری کۆماری ئیسلامی هاوڕێیەكی ئازیزی لێرفاندین، بەڵام بە دڵنیاییەوە بەهەزاران لاوی خوێنگەرمی ئەم نیشتمانە بە گوڕوتینتر لە هەمیشە درێژە بە رێبازی پیرۆزی هاوڕێ شوعەیب دەدەن و خەوی ئاسوودەیی لە چاوی دوژمن و نەیارانی خەڵكی كوردستان و کۆمەڵە دەزڕێنن.
ئێمە وێرای مەحکوومکردنی ئەو کارە دژە مروویی و قێزەونەی کۆماری ئیسلامی داوا لە سەرجەم حیزب و لایەنە سیاسییەکانی کوردستانی رۆژهەڵات و حکوومەتی هەرێمی کوردستانی باشوور و ناوەندەكانی مێدیایی ئازاد و سەرجەم رێکخراوە ناخۆیی و جیهانییەکانی مافی مرۆڤ دەکەین کە لە ئاست كردەوەی لەوچەشنەی کۆماری ئیسلامی بێدەنگ نەبن و سنوورێك بۆ ئاجێندا تێرۆریستییەكانی كۆماری ئێسلامی دابنێن.
بەرز و بەڕێز بێت ناو و یادی هاوڕێ شۆعەیب زارعی و سەرجەم گیانبەختكردووانی بزاڤی ڕزگاریخوازانەی كوردستان .
ناوەندی ڕاگەیاندنی كۆمەڵەی شۆڕشگێری زەحمەتكێشانی كوردستانی ئێران .
٢٧ی ڕەشەمەی ١٤٠٢ی هەتاوی
١٧ی مارسی ٢٠٢٤ی زایینی
