کۆمەڵانی ئازدیخواز و عەداڵەتپەروەر،
خەڵکی خۆڕاگر و نیشتمانپەروەری کوردستانی ڕۆژهەڵات،
ژنانی پێشەنگ و لاوانی پێشڕەوی ڕزگاریخواز،
بنەماڵەی سەربەرزی گیانبەختکردووان، زیندانیانی سیاسی، برینداران و خەسارلێکەوتووانی بزووتنەوەی ژن، ژیان، ئازادی!
کۆنگرەی شازدەهەمی کۆمەڵەی شۆڕشگێڕی زەحمەتکێشانی کوردستانی ئێران، پەیامی خۆشەویستی و ئەمەگناسی و پاڵپشتیی خۆی بۆ هەموو ئێوەی ئازیز و خۆنەویست دەردەبڕێت. ئێوە کە بۆ گەیشتن بە مافە ڕەواکانتان، بەو پەڕی لەخۆبردوویی و بوێری و ئازایەتییەوە لەهەمبەر دەسەڵاتی چەوسێنەر و نگریسی کۆماری ئیسلامیدا وەستانەوە و، بوون بە مەشخەڵێکی ڕووناکیبەخش و ئاڵاهەڵگری خەباتێکی ئەمڕۆیی و شوێندانەر. ڕاپەڕینی ئەمجارەشتان هەمدیسان گەوهەری کەرامەتی ئینسانی و ئەرکی پاراستنی بەها مرۆییەكانی خستەوە ڕۆژەڤ و، پەیامی ئازادیخوازیی و سەربزێویی و زیندوبوونی نەتەوەیەکی بندەستی گەیاندە گوێی هەموو نەتەوەکانی دیکەی ئێران و دەرەوەی ئەم وڵاتە و بوو بە ڕێنوێن و ئیلهامبەخشی جیهانیان.
خەڵکی خۆڕاگر و نیشتمانپەروەری کوردستانی ڕۆژهەڵات
ئەم بزووتنەوە کەم وێنەیە بەرهەمی کەلتورێکی ڕەسەن و دەوڵەمەند و، هەڵقوڵاوی کۆمەڵگایەکی پێگەیشتوو وپێشکەوتنخوازە کە بە خواستگەلێکی سەرەتایی و هاوکات بنچینەیی، ئاستی وشیاریی و وریایی و شارستانییەتی تاک و کۆمەڵگەی کوردستانی ڕۆژهەڵاتی وێنا کردەوە. خواستەکانی ئەم بزووتنەوەیە، بەرهەم و کۆکراوەی پتر لە ٥ دەیە خەبات و چالاکی کۆمەڵەیە و لەگەڵ مێژوو و پێناسەکەی بە تەواوی یەکانگیرە.کۆمەڵە بەردەوام لەو بڕوایەدا بووە کە مافی ژیان و ئازادی و بەرابەری نەک تەنیا هەر بۆ نەتەوەی کورد بەڵکوو بۆ هەموو مرۆڤەکان مافێکی پێویست و گشتگیر و حاشاهەڵنەگرە بەڵام مەیدانی تێکۆشان و ئەرکی سەرەکی ئێمە وەدیهاتنی ئەم داخوازییانە لە کوردستانە و ئەمەش وەک ئەسڵێکی بنەڕەتی و ئامانجێکی هەمیشەیی دەمێنێتەوە.
بزووتنەوەی ژن، ژیان، ئازادی کە بە دوای قەتڵی حکوومەتی ژینائەمینی بە دەست کاربەدەستانی کۆماری ئیسلامی و لە شاری سەقز سەری هەڵدا، زۆر زوو تەشەنەی سەند و بە هەموو پانتایی شارەكانی کوردستاندا بڵاو بووەوە. زۆری نەخایاند کە ئەم شەپۆلە گەیشتە ناوچەکانی دیکەی ئێران و، کۆمەڵگاکەی ڕاچڵەكاند و شەقامەکانی جووڵاند. کوردستان سەرەڕای سەرکوت و تێچوویەکی دووهێندەیی، دەستپێشخەر و مێعماری ئەم ڕاسانە بوو و بە بەردەوامی وەکوو سەنگەر و مەکۆی ئەم ئاخێزە، خۆراگر و سەربەرز مایەوە تاکوو ئەزموون و بەڵگەیەکی پڕشنگداری دیکە لە مێژووی خەباتی خۆیدا تۆمار بکا.
ژنانی پێشەنگ و کۆڵنەدەری کوردستانی ڕۆژهەڵات
ژیان بە ژنەوە دەست پێدەکا و گەیشتن بە ئازادی لە گرەوی ئازادی ژندایە، بزووتنەوەی ژن، ژیان، ئازادی بە هەقیقەت بەرهەمی پێشەنگایەتی و تێکۆشان و چالاکی ژنانی کوردستان بوو کە دەنگیان بە هەموو دونیا گەیشت و بە گوێی هەموو چەوسێنەرێکدا زرینگایەوە. ئێوە بوون کە جڵەوی ئەم بزوووتنەوە بەرفراوان و بەرینەتان گرت و، بە پشتیوانی و هاوخەباتی پیاوانی تێگەیشتوو و هوشیار بە گژ کۆنەپەرەستی و زۆرداری و ستەمدا چوونەوە. لە ناوچەیەکدا کە ئائینی سیاسی و فەرهەنگی پیاوسالارانەی دواکەوتوو، ئازادی و یەکسانی و ژیانی سەربستی کردووتە ئامانج، ئێوە هاوکێشە و پارسەنگی هێزتان گۆڕی و چیرۆکی گرنگبوونی چۆنییەتی ژیانتان بۆ کچانی نیشتمان گێڕایەوە. دڵنیاتان دەکەینەوە لە هەموو قۆناغەکانی تۆمارکردنی ئەم شانازییەدا، لە شەقامی شارەکان و لادێکانی کوردستانی ڕۆژهەڵات، لە کوردستانی باشوور و لە دەرەوەی وڵات، کۆمەڵە لەگەڵتان و هاوڕێ و هاوسەنگەرتان بووە و هاوشانی ئێوە، هەستی بە بەرپرسایەتی کردووە، تێکۆشاوە و تێچووی بۆ داوە.
لاوانی خوێنگەرم و بەرپرس و پێشڕەوی کوردستانی ڕۆژهەڵات
ئێوە وەک شۆڕەلاوانی سەربزێو و چاونەترسی کۆمەڵگای کوردستانی ڕۆژهەڵات، میراتهەڵگری مێژوویەکی نەخوازراون و لە هەمان کاتدا وزەی یەکلاییکەرەوەی ئێستان و دەتوانن ببن بە چارەنووسسازی داهاتوویەکی گەش. ئێوە ئەرکێکی گرینگ و تایبەتتان لەم قۆناغە مێژوویەدا لە ئەستۆیە و بە کردوە سەلماندتان کە شیاوی هەڵگرتنی ئەو بەرپرسایەتییەن. لە ساڵانی ڕابردوو ئێوە بوون و هەن کە بەو پەڕی شەهامەت و لەخۆبردووییەوە بە خشت و بەرد سەنگەرتان لە ئاگر و ئاسن گرتوو و سەرەڕای هەموو تێچوو و خەسارێک، خاوەنداریتان لە مێژوو و ئێستا و داهاتوو کرد. ئێمە ڕێز لە گیانبازی و هەست بە بەرپرسایەتی و خۆڕاگریتان دەگرین و وانەی خەباتتان لێوە فێر دەبین. لە هەموو ئەم چەند دەیەی ڕابردوو ئێوە بوون کە نەسل و نەوە یە لەدوای یەک، سەنگەری بەرەنگاری و خەباتتان ئاوەدان هێشتووەتەوە و چرای ڕێگای داهاتووتان بە گەرمی ڕاگرتووە.بەڵێن دەدەین وەک کۆمەڵە و هاوتەمەنانی ئێوە لە ڕێزەکانی ئەم حیزبەدا، شانبەشانی ئێوە و بە پاڵپشتی یەکتر هەتا گەیشتن بە لووتکەی ئاواتە بەرزەکانمان، یەک بست لە خواستە ڕەوا و ئینسانییەکان پاشەکشێ ناکەین.
بنەماڵەی سەربەرزی شەهیدان
ئەم هەڵمەتەش، وەک هەموو هەڵمەتێکی ڕزگاریخوازانەی جەماوەریی، بێ تێچوو نەبوو و بەداخەوە لەم بەشەشدا کوردستان پشکی شێری بەرکەوت. ئەگەرچی هیچکام لەم تێچووانە بێ دەستکەوت نابێت و دڵنیاین دەبێتە تینی هەنگاوێکی بە گوڕ و چرایەکی ڕێنوێن بۆ ڕێگامان تا گەیشتن بە سەربەستی و هاتنەدی ئاواتی ئازاد ژیان.
بەداخەوە بە دەیان ڕۆڵەی دلێری ئەم نیشتمانە گیانی پاکی خۆیان بەخت کرد بەڵام ئەوان شەقام و کۆڵانیان کرد بە سەنگەر و سینگیان کرد بە قەڵغان. هەر دڵۆپێك لە خوێنی ڕژاویان، تینوویەتی نەمامی هیوای شکاند و موژدەی ژیانەوەی گەیاند. فیداکاری و گیانبازیی و ئیرادەی لەشکان نەهاتوویان، سەلماندی کە ئەم دەسەڵاتە لەگەڵ خواستی گەل و فەرهەنگی کوردستان نامۆیە و بە زەبری سەرکوت نەبێت لە چاوتروکانێکدا ڕادەماڵدرێت.
ئێوە وەک دایک و باوک و بنەماڵە سەربەرزەکانتان، دەور و نەخشێکی مێژوییتان گێڕا. لە جیاتی شین و شیوەن، شاییتان بەو شانازییەوە گێڕا و حەماسەتان خولقاند. بەو پەڕی ورە و لەخۆبردووییەوە گیانی ئازیزترین کەسەکانتان پێشکەش بە ئامانجە ڕەوا و بەرزەکان کرد. تەرمی پیرۆزیانتان بە خاکی کوردستان بەخشی بەڵام نە تەنیا چۆکتان نەلەرزی بەڵکوو قەڵای زۆردارانتان لەرزۆکتر و بنکۆڵتر لە جاران کرد. سەری رێز و نەوازش بۆ گیانی پاکی شەهیدانی شۆڕشی ژینا و خۆڕاگری بنەماڵەکانیان دادەنوێنین و، بەڵێن دەدەین هەتا گەیشتن بە لووتکەی ئامانجەکانیان پارێزەری ڕێباز و ڕێبواری ڕێگایان دەبین.
برینداران و زیدانیانی سیاسی و خەسارلێکەوتووان،
بە هەزاران بریندار و ئازارچێشتوو و خەسارلێکەوتووی ئەم بزووتنەوەیە، لە بەرانبەر دەسەڵاتی ستەمکار و دەزگا سەرکوتەکەی و، لەهەمبەر توندوتیژییەکی بێسنووردابەدەربەستانە بەشێک لە جەستە یان ماڵ و حاڵیان بەخشی، ژیانی سەربەرزانەیان هەڵبژارد و بە ورەیەکی بەرز و ئیرادەیەکی پتەو کۆڵیان نەدا و دوژمنیان بێهیوا کرد. زیندانیانی سیاسی لە ژێر ئەشکەنجە و ئازار لە گرتووخانەکانی ڕژیمدا بەو پەڕی خۆڕاگرییەوە وەستاونەتەوە و سەنگەری بەندیخانەیان بە پێوە ڕاگرتووە. هەر لێرەوە هەستی ئەمەگناسی و پێزانینی خۆمان ئاراستەی ئێوە و بنەماڵە خۆڕاگرەکانتان دەکەین و خۆمان بە شەریکی ئێش و ئازاری هەمووتان دەزانین. بەڵێن دەدەین تێچووەکانتان بە بێ دەستکەوت نابێت و خەڵکی کوردستان و نەوەکانی داهاتوو خۆی بە قەرزدارتان دەزانێت.
ئێستا کە ئامانجەکانی ئەم بزووتنەوەیە بووەتە بەشێک لە ژیانی ڕۆژانە و ئاسایی خەڵک و، وەک مافێکی بێ ئەملاوئەولا لە وشیاریی تاکەکاندا سەلمێندراوە، دڵنیاین کە بزووتنەوەکە بێ ئاکام نامێنێتەوە و ڕێگای خۆی بەرەو سەرکەوتن دەکاتەوە.کۆنگرەی ١٦ پشتیوانی و پاڵپشتی خۆی بۆ خەباتتان دەردەبڕێت و بەڵێن دەدات، کۆمەڵە شێلگیرتر لە پێشوو شانبەشانی ئێوە لە دژی هەرجۆرە هەڵاواردن و سەرکوت و نابەرابەرییەک خەبات و تێکۆشانی درێژە پێدەدا و هەنگاوەکانی بەرەو ڕزگاری چڕ دەکاتەوە.
ڕۆژی ڕزگاریی و سەربەستیمان نزیکە و داهاتوویەکی گەشاوە و ڕوون لە ئاسۆماندا دەدرەوشێتەوە. جارێکی دیکە پەیامی ئەمەگناسی و پێزانینی خۆمان بۆ هەموو خۆڕاگری و خەبات و قوربانیدانتان دەردەبڕین. لە داهاتوویەکی نزیکدا هەموومان پێکەوە بەرەو پیری ژیانێکی شیاو و سەربەست دەڕۆین و یادی ئازیزی شەهیدان بەرز و تێچووی هەموو بەشداربووان بە نرخڕادەگرین.
«ژن، ژیان، ئازادی»
کۆنگرەی ١٦ی کۆمەڵەی شۆڕشگێڕی زەحمەتکێشانی کوردستانی ئێران
سەرماوەزی ١٤٠٣ی هەتاویی
ڕێكەوتی دێسامبری ٢٠٢٤ی زایینی
پەیامی کۆنگرەی ١٦ی کۆمەڵە بۆ بەشداربووان و بەرکەوتووانی بزووتنەوەی «ژن، ژیان، ئازادی»
