٤٦ ساڵ لەوە پێش، دوابەدوای سەرکەوتنی ڕاپەڕینی خەڵکی ئێران بەسەر حکومەتی پاشایەتی، لە وەها ڕۆژێكدا ئایەتوڵڵا خومەینی فەرمانی هێرشی هەمەلایەنەی بۆ سەر كوردستان و خەڵکی کورد دەركرد. ئەو هێرشە ناڕەوا و بێ پاساوە، خاڵی وەرچەرخانێكی گەورەی لە مێژووی كوردستانی ڕۆژهەڵات پێك هێنا و بوو بە دەستپێکی قۆناغێكی بەتەواوەتی نوێ و جیاواز بۆ گەلەکەمان. بڕیاری بەرەنگاری لە هەمبەر هێرشی بەرین و گەوەری كۆماری ئیسلامی بۆ سەر كوردستان، لە ئێوارەی هەمان ڕۆژی فتوای خومەینی لەلایەن ڕێبەرایەتی کۆمەڵەوە دەركرا و هەتا ئێستاش، بۆ ماوەی ٤٦ ساڵە بەردەوامە.
ئەو بڕیارە مێژووییە ڕەنگدانەوەی ئیرادەی نەتەوەیی کورد و ئاوات و ویستی كۆمەڵانی بەرینی خەڵكی كوردستان بوو لەپێناو خواستی سەربەستی و ئازادی و ئازاد ژیان. هەر بۆیەش ئەگەرچی ٢٨ی گەلاوێژ وەبیرهێنەرەوەی کاولکاری و هێڕشی تاوانکاران و تاوانی دڵتەزێن بەدژی كورد، کوشتنی خەڵکی سڤیل و ئیعدامی بە كۆمەڵ، تیرباران كردنی بێ دادگایی و یادەوەری ڕۆژێكە كە داسی مەرگی كۆماری ئیسلامی سەری بەرزی كوڕان و كچانی كوردەواری بڕیەوە، بەڵام لە هەمان كاتیشدا بۆنەیەکی تایبەت و ڕۆژی بەرگری و وەستانەوە و بەرەنگاریی نەتەوەیی خەڵكی كوردستانە. ڕۆژێك كە كوردی ڕۆژهەڵاتی لەو سەروبەندەدا كە خەریك بوو دەكەوتە ژێر چنگی دیكتاتۆرییەكی ئایینیی بێ بەزەیی، بوو بە سەنگەر و سیمبولی موقاومەت و بەرخۆدان. بەبێ ئەو خەباتە هەمەلایەنە سیاسی، كۆمەڵایەتی، ڕۆشنبیری و پێشمەرگانەیە، كورد لە ئێران نەیدەتوانی بزووتنەوەكەی بۆ نزیک لە نیو سەدە و لە دژوارترین بارودۆخدا زیندوو ڕابگرێت و كوانووی خەبات بە گەرم و گوڕی بهێڵێتەوە، بۆیەش هەموو تاك و بنەماڵەیەكی كورد لە ڕۆژهەڵات پێویستە قەدری ئەو ئەزموون و وەستانەوە و بەرەنگارییە بزانێ و بۆ نەوەی نوێی بگوازێتەوە.
ئێمە کاتێک بڕیاری وەستانەوەمان دا کە نە جیهان لەسەرمان هاتە دەنگ، نە لەشكرێك پشتی گرتین، نە ئامرازی نوێی ڕاگەیاندن هەبوو، نە ناوەندێکی نێونەتەوەیی كە سكاڵای لا تۆمار بکەین، نە تەنانەت تۆڕە كۆمەڵایەتییەكان كە دەنگمان بە گوێی دونیا بگەیەنێت. سەرەڕای ئەوە، گەلی کورد لە خۆڕاگری و خۆبەخشی و گیانبازی و ڕۆحی شۆڕشگێڕبوون هیچی كەم نەهێنا.
ئێستاش کە لەلایەکەوە لە جیهانێكی جیاوازدا دەژین و دەنگی ئازادی و دادخوازی چیتر وەكوو جاران كپ ناكرێت و جێگەوپێگەی دیكتاتۆرەكان و ڕژیمە داپڵۆسێنەرەكان خەریكە لەق و لاواز دەبێت و لەلایەکی دیکەوە كورد لە دونیا ناسراوە و لە ناوچەكە دەسكەوتی گەورەی بەدەست هێناوە هەروەها کۆماری ئیسلامی لە لێوارەی ڕووخاندایە، ئێمەی كوردی ڕۆژهەڵات زیاتر لە هەموو شتێك پێویستیمان بە بووژانەوەی خەباتی نەتەوەکەمان و جوڵانەوەی ڕۆژهەڵاتە، مەرجی سەرەكی ئەمەش یەکڕیزی و یەكگرتویی نێوخۆییمانە. بە هاوپشتی و یەكگرتوویی، دەتوانین هەموو هەڕەشەكان بەرپەرچ بدەینەوە و هەموو هەلێکیش بقۆزینەوە. تەنیا لەو کاتەشدایە كە دەتوانین سەرکەوین و سەرنجی كۆمەڵگەی نێونەتەوەیی بۆ لای كوردستانی ڕۆژهەڵات و خەباتەكەی و داخوازییەكانی ڕاكێشین.
با ٢٨ی گەلاوێژی ئەمساڵ بكەینە ڕۆژی یەكگرتوویی و یەكدەنگی حیزبە سیاسییەكان و ڕۆژی دەستپێکی قۆناغی نوێی خەباتی خەڵكی كوردستان دژ بە ڕژیمی داگیركەری كۆماری ئیسلامی. ئێمە لەم ڕۆژەدا سەری ڕێز بۆ خۆڕاگری و بەرەنگاریی نەتەوەیی خەڵکەکەمان دادەنوێنین و لە لایەن هەموو ڕیزەكانی كۆمەڵەوە پەیمان نوێ دەكەینەوە تا وەدەستهێنانی مافە ڕەواکانی خەڵكی كوردستان خەبات دەکەین و بەردەوام دەبین. لەو پێناوەشدا هەموو توانا و هەوڵی خۆمان دەخەینە گەڕ تا ئازادی و ڕزگاری بۆ نەتەوەکەمان و چەوساوەكانی كوردستان دابین بكەین و هاوئاهەنگ لەگەڵ هەموو گەلانی خەباتكاری ڕێگەی ئازادی بۆ نەمانی ئەو ڕژیمە و گەیشتن بە ماف و ویستەکانمان تێدەكۆشین.
کۆمەڵەی شۆڕشگێڕی زەحمەتکێشانی کوردستانی ئێران
سکرتارییەتی کومیتەی ناوەندیی
٢٨ی گەلاوێژی ١٤٠٤ی هەتاویی
١٩ی ئاگۆستی ٢٠٢٥ی زایینی
